Iran Khodro. իրանական ամենախոշոր ավտոարտադրողը զարգացման մեծ ներուժ ունի, սակայն սանկցիաների պատճառով հնարավորությունները սահմանափակ են
Իրանական Iran Khodro արդյունաբերական ընկերությունը Իրանում ամենախոշոր ավտոարտադրողն է։ Ընկերությունը հիմնադրվել է 1962 թվականին և, տարիների ընթացքում ընդլայնվելով, այժմ դարձել է իրանական ամենախոշոր ավտոարդատրողը՝ զբաղեցնելով իրանական շուկայի 48-52 տոկոսը։ Այս մասին փոխանցում է «Արմենպրեսը»։
Iran Khodro ընկերության միջազգային հարաբերությունների փորձագետ Ալի Խոսրավին հայտնեց, որ ընկերության ավտոմեքենաների արտադրության համար օգտագործվող սարքավորումների և կոմպոնենտների 85 տոկոսն արտադրվում է Իրանում, 15-ը ներմուծվում է այլ երկրներից։
Սարքավորումների արտադրության համար պատասխանատու է Iran Khodro-ի մաս կազմվող Sapko ընկերությունը, որը համագործակցության պայմանագրեր ունի Իրանում գործող ավելի քան 500 արտադրողների հետ։
Sapko ընկերության համար աշխատող կազմակերպություններից մեկն Itrac-ն է, որը պատասխանատու է արտադրված սարքավորումների թեստավորման համար։ «Ավտոարտադրության համար անհրաժեշտ բոլոր սարքավորումները պետք է թեստավորում անցնեն Itrac ընկերությունում»,- նշում է Խոսրավին։
TAMIRANKHODRO ընկերությունն էլ պատասխանատու է ավտոարտադրության գործընթացում կիրառվող ավտոմատացված համակարգերի համար։ «Ռոբոտների սպասարկումը իրականացնում են TAMIRANKHODRO ընկերության ինժեներները, որի աշխատակիցների մեծամասնությունը Իրանից են, նրանցից ոմանք կրթություն են ստացել արտերկրի տարբեր համալսարաններում։
Իրանի դեմ կիրառվող պատժամիջոցների պատճառով ընկերությունն ավտոմեքենաների արտահանման հետ կապված լուրջ խնդիրներ ունի։ Ալի Խոսրավին մանրամասնեց, որ այս պահին կարողանում են իրենց ավտոմեքենաները Իրաք արտահանել, սակայն նախկինում մոտավորապես 50 հազար ավտոմեքենա էին արտահանում, հատկապես Ռուսաստան։ «Ռուսաստանում մենք նախկինում 25 դիլեր ունեինք։ Հայաստանում՝ Երևանում, մենք դիլերային կետ ունենք, բայց այն այս պահին ակտիվ չէ։ Մենք հիմա աշխատում ենք խոչընդոտներն ու խնդիրները հաղթահարելու ուղղությամբ, որպեսզի կարողանանք արտահանում իրականացնել։ Հատկապես մեր վերջին արտադրանքները՝ Dera և Tara մակնիշի ավտոմեքենաները նվազագույնը կարող էին արտահանվել մեր հարևան երկրներ։ Բայց հիմա մենք խնդիրներ ունենք»,- ասաց Խոսրավին՝ նշելով, որ նախկինում արտահանում էին իրականացնում նաև Սիրիա, սակայն այդ երկրում տեղի ունեցած իշխանափոխությունից հետո արտահանումը դադարել է։
Խոսրավին հայտնեց, որ այս պահին ավտոմեքենաների համատեղ արտադրություն ունեն Իրաքի, ինչպես նաև սերտ համագործակցություն չինական Haima ընկերության հետ։
Iran Khodro-ն տարեկան շուրջ 700 հազար ավտոմեքենա է արտադրում։ Բացի սեդաններից, ընկերությունն արտադրում է նաև ավտոբուսներ, միկրոավտոբուսներ բեռնատարներ և ամենագնացներ։
Ընկերության արտադրած առաջին ավտոմեքենան եղել է Samand-ը, երկրորդը՝ Runna-ն։ «Դրանից հետո մենք սկսել ենք արտադրել Tara մակնիշի ավտոմեքենաները, իսկ մեր ամենավերջին արտադրանքը Dera-ն է, որն ամենագնաց է, որը մեր արտադրած ամենաշքեղ մեքենան է»,- նշեց Խոսրավին։
Iran Khodro-ում ավտոարտադրության պրոցեսն 80 տոկոսով ավտոմատացված է, ավտոմեքենաները հավաքվում են գերմանական ռոբոտ սարքերի միջոցով։ Այնուամենայնիվ, չնայած այն հանգամանքին, որ արտադրության գործընթացը մեծամասամբ ավտոմատացված է՝ ընկերությունն ունի մոտ 20 հազար աշխատակից։
Ընկերության՝ Թեհրանում գտնվող արտադրամասում շրջայցի ընթացքում նկատեցինք, որ աշխատակիցների մեծամասնությունը երիտասարդներ են։ Ընկերության ներկայացուցիչները նշեցին, որ իրենց ղեկավարությունը որդեգրել է երիտասարդ կադրերով համալրվելու քաղաքականությունը՝ վստահ լինելով, որ Իրանում ավտոարտադրությունը շարունակելու է զարգանալ և ապագա ունի։
Ընկերության արտադրած ավտոմեքենաները մեծ պահանջարկ ունեն իրանական շուկայում։ Քանի որ երրորդ երկրներից մեքենաների ներմուծման մաքսատուրքերը շատ բարձր են Իրանում, երկրում հիմնականում սպառվում են տեղական արտադրության ավտոմեքենաները, իսկ այս շուկայում գերիշխող դիրք ունի հենց Iran Khodro-ն։ Երկրում երկրորդ խոշոր ավտոարտադրողը SAIPA-ն է։ Կան նաև այլ ավտոարտադրողներ, ինչպես նաև ներմուծվում են ավտոմեքենաներ տարբեր երկրներից։ Մասնավորապես, Թեհրանում որոշակի ժամանակ շրջելու դեպքում կարելի է նկատել, որ արտասահմանյան ավտոմեքենաներից ավելի շատ պահանջարկ ունեն չինական արտադրության մեքենաները։ Հազվադեպ կարելի է նկատել նաև գերմանական, կորեական արտադրության հայտնի բրենդների մեքենաներ։
