ՄԱԳԱՏԷ-ի պատվիրակությունը հաջորդ շաբաթ կայցելի Թեհրան
ՄԱԳԱՏԷ-ի պատվիրակությունը հաջորդ շաբաթ կայցելի Թեհրան՝ քննարկելու գործակալության հետ համագործակցությունը դադարեցնելու մասին Իրանի խորհրդարանի կողմից վերջերս ընդունված օրենքի իրականացումը, հայտնում է Al Mayadeen-ը՝ հղում անելով իրազեկ աղբյուրներին։
Աղբյուրները հաստատել են, որ առաջիկա բանակցությունները կենտրոնանալու են երկու կողմերի հարաբերությունների քաղաքական ասպեկտի վրա։ Գործակալության պատվիրակության կազմում տեսուչներ չեն լինի։
Աղբյուրներն ընդգծել են, որ Իրանի և ՄԱԳԱՏԷ-ի միջև հարաբերություններում նոր փուլ կմեկնարկի խորհրդարանի կողմից ընդունված նոր օրենքի շրջանակներում։
Ավելի վաղ Իրանը հայտնել էր, որ համաձայնել է ընդունել ՄԱԳԱՏԷ-ի տեխնիկական խմբին։
Հուլիսին Իրանի ԱԳ նախարար Աբաս Արաղչին հայտարարել էր, որ Իրանի համագործակցությունը ՄԱԳԱՏԷ-ի հետ չի դադարել, սակայն կստանա նոր ձևաչափ, «ինչը միանգամայն բնական է՝ հաշվի առնելով «հողի վրա» առկա իրողությունը և տեղի ունեցած իրադարձությունները»։
Նախարարը հավելել էր, որ, համաձայն մեջլիսի օրինագծի, Թեհրանի հետագա ողջ համագործակցությունը գործակալության հետ կկարգավորի Իրանի ազգային անվտանգության բարձրագույն խորհուրդը։
