ՍԱՏՄ-ն այս պահի դրությամբ 7 կազմակերպության թույլատրել է Ռուսաստան արտահանել հայկական ծաղիկներ
Սննդամթերքի անվտանգության տեսչական մարմինն ակտիվորեն զբաղվում է դեպի Ռուսաստան հայկական ծաղիկների արտահանման խնդիրներով: Այս մասին հայտնում են ՍԱՏՄ-ից՝ ընդգծելով, որ այս պահին 7 կազմակերպության թույլատրվել է արտահանումը:
«Մեր գործընկեր կառույցի՝ ՌԴ անասնաբուժական և բուսասանիտարական վերահսկողության դաշնային ծառայության (Ռոսսելխոզնադզոր) հետ համատեղ ակտիվորեն զբաղվում ենq դեպի Ռուսաստան հայկական ծաղիկների արտահանման խնդիրներով:
Ծաղկի արտադրավայրերում՝ ջերմոցային տնտեսություններում, անցկացվել են համատեղ առցանց տեսահսկողական միջոցառումներ, որոնց արդյունքում որոշվում է կոնկրետ արտադրողի արտադրանքի Ռուսաստան արտահանելու հարցը:Այս պահին ունենք արդեն 7 կազմակերպություն, որոնց, համատեղ տեսչական վերահսկողությունից հետո, թույլատրվել է արտահանումը, մյուս տնտեսություններում միջոցառումները շարունակվում են»,- նշված է ՀՀ ՍԱՏմ-ի տարածած հաղորդագրության մեջ:
Նույն հաղորդագրության մեջ ընդգծվում է, որ առաջիկայում աշխատանքային այցով Հայաստան կայցելի Ռոսսելխոզնադզորի մասնագետների խումբը՝ ՍԱՏՄ տեսուչների հետ համատեղ ծաղկի ջերմոցային տնտեսություններին տեղում ծանոթանալու և բուսասանիտարական իրավիճակն ուսումնասիրելու նպատակով:
