Վաշինգտոնն աջակցում է Հարավային Կովկասում խաղաղությունը խթանելու ջանքերին․ Թեմի Բրյուս
Միացյալ Նահանգներն աջակցում է Հարավային Կովկասում խաղաղության և կայունության խթանմանն ուղղված ջանքերին։ Այս մասին լրագրողների հետ ճեպազրույցի ժամանակ նշել է Միացյալ Նահանգների պետքարտուղարության խոսնակ Թեմի Բրյուսն՝ անդրադառնալով Հայաստանի և Ադրբեջանի միջև խաղաղության շուրջ ընթացող գործընթացին։
Ճեպազրույցի ընթացքում Թեմի Բրյուսն անդրադարձել է հարցին, թե արդյոք Վաշինգտոնը կոնկրետ պլան կամ առաջարկ ունի՝ աջակցելու Հայաստանի և Ադրբեջանի միջև խաղաղության համաձայնագրին։
«Միացյալ Նահանգներն աջակցում է Հարավային Կովկասում խաղաղությունը և կայունությունը խթանելու ջանքերին։ Մենք նաև հետևում ենք մամուլի հաղորդագրություններին և կիսելու որևէ լրացուցիչ տեղեկատվություն չունենք»,-նշել է Բրյուսը:
Նա նաև կարծիք է հայտնել, որ ԱՄՆ նախագահ Դոնալդ Թրամփի վարչակազմի և պետքարտուղար Մարկո Ռուբիոյի մոտեցումները խոսում են այն մասին, որ Միացյալ Նահանգների ներկա վարչակազմն աշխատում է խաղաղության համար:
«Նրանք կանեն այն, ինչ պետք է և կգնան այնտեղ, որտեղ պետք է: Դա չի նվազել: Դա պայմանավորված է նրանով, որ դա Ամերիկան կրկին մեծ դարձնելու հանձնառության միջուկն է, որն, իհարկե, բարելավում է մեր շրջապատող աշխարհի վիճակը»,-ասել է Թեմի Բրյուսը:
