ԱՄՆ-ն դատապարտել է Կարմիր ծովում հութիների հարձակումները բեռնատար նավերի վրա
Միացյալ Նահանգները դատապարտել է Կարմիր ծովում եմենցի հութիների հարձակումները Magic Seas և Eternity C բեռնատար նավերի վրա, որոնց հետևանքով զոհվել է 3 նավաստի:
Այս մասին հայտարարություն է տարածել Պետքարտուղարության մամուլի ծառայությունը։
«Այս հարձակումները ցույց են տալիս այն պահպանվող սպառնալիքը, որ Իրանի կողմից աջակցվող հութի ապստամբները ներկայացնում են նավարկության ազատության և տարածաշրջանային տնտեսական ու ծովային անվտանգության համար», – նշված է հաղորդագրության մեջ:
Պետքարտուղարությունը հավելել է՝ Միացյալ Նահանգները «կշարունակի ձեռնարկել անհրաժեշտ միջոցները՝ հութիների ահաբեկչական հարձակումներից նավագնացության ազատության և առևտրային նավերի պաշտպանության համար»:
Հուլիսի 8-ին Հունաստանի ERT-news հեռուստաալիքը հաղորդել է, որ երեք մարդ է զոհվել, երկուսը՝ վիրավորել Կարմիր ծովում Լիբերիայի դրոշի ներքո նավարկող հունական Eternity C բեռնատար նավի վրա հութիների հարձակման հետևանքով: Դա երկու օրվա ընթացքում երկրորդ հարձակումն է:
Հուլիսի 6-ին Լիբերիայի դրոշի ներքո նավարկող և Չինաստանից մետաղ և պարարտանյութեր տեղափոխող հունական Magic Seas բեռնատար նավը հարձակման է ենթարկվել Հոդեյդայից հարավ-արևմուտք: Հարձակման պատասխանատվությունն ստանձնել են «Անսար Ալլահ» խռովարար շարժման հութիները:
Ըստ Reuters գործակալության՝ ծովային անվտանգության բնագավառում մասնագիտացած բրիտանական Ambrey ընկերությունը հաստատել է, որ հութիների կողմից հարձակման ենթարկված Magic Seas բեռնատար նավը խորտակվել է Կարմիր ծովում:
2023 թվականի աշնանը Գազայի հատվածում հակամարտության սրումից հետո հութիները զգուշացրել են, որ հարվածներ կհասցնեն Իսրայելի տարածքին և նրա հետ կապված նավերին թույլ չեն տա անցնել Կարմիր ծովի և Բաբ էլ Մանդեբի նեղուցի ջրերով, մինչև պաղեստինյան անկլավում ռազմական գործողությունները չդադարեցվեն: Այս ընթացքում իրականացվել է մոտ հարյուր հարձակում:
