Բագրատ Սրբազանին ու մյուսներին ձերբակալած իրավապահները պետական պարգևի կարժանանան. Փաշինյան
Նիկոլ Փաշինյանը գոհ է «Սրբազան պայքար» շարժման մասնակիցների տանը կատարված խուզարկություններից և կալանավորումներից։
«Համոզված եմ` երեկ բոլորդ հետևել եք իրադարձություններին, և կարևոր է արձանագրել, որ բացահայտվել է մեր պետականության, ՀՀ անվտանգության և կայունության դեմ նախապատրաստվող հանցագործություն, և, բնականաբար, կանխվել է այդ պլանի իրագործումը։ Ուզում եմ շնորհակալություն հայտնել իրավապահ համակարգի բոլոր ներկայացուցիչներին»,- կառավարության այսօրվա նիստի ժամանակ ասաց նա։
Փաշինյանը տեղեկացրեց, որ առավոտյան խորհրդակցել է ՀՀ նախագահ Վահագն Խաչատուրյանի հետ, և որոշել են, որ իրավապահ համակարգի բոլոր` առավել արդյունավետ գործած ներկայացուցիչներին կներկայացնեն պետական պարգևատրման։
«Երեկ հանրային քննարկումներում, սոցիալական ցանցերում մի շեշտադրում ուշադրությունս գրավեց, որ օգտատերերից մեկը նշել էր, թե ՀՀ-ում նոր հոկտեմբերի 27 է կանխվել, մի ուրիշ խումբ էլ հարց էր բարձրացնում, թե արդյոք 1999 թվականին ՀՀ իրավապահ մարմինը կարո՞ղ էր կանխել հոկտեմբերի 27-ի ահաբեկչությունը։ Սա մի հարց է, որը ևս պետք է վստահելի ձևով ձևակերպենք։ Հույս ունեմ, որ մեր իրավապահ համակարգն այս հարցի պատասխանը գտնելու համար ջանքեր կգործադրի»,- ընդգծեց Փաշինյանը։
