Զելենսկին նամակ է գրել Թրամփին
Ուկրաինայի նախագահ Վլադիմիր Զելենսկին նամակ է հղել ամերիկյան առաջնորդ Դոնալդ Թրամփին։ Այն պարունակում է պաշտպանական արդյունաբերության և առևտրի ոլորտներում համագործակցության նոր առաջարկներ, հայտնում է ՌԲԿ-Ուկրաինան՝ հղում անելով Ուկրաինայի նախագահի պաշտոնական կայքին։
Այսօր Հռոմում Զելենսկին հանդիպում է անցկացրել ԱՄՆ փոխնախագահ Ջեյ Դի Վենսի և ԱՄՆ Պետդեպարտամենտի ղեկավար Մարկ Ռուբիոյի հետ։ Նամակի մասին տեղեկատվությունը հրապարակվել է այս հանդիպման մասին հաշվետվության մեջ։
«Առանձնահատուկ ուշադրություն՝ Ուկրաինայի և ԱՄՆ-ի միջև տնտեսական գործընկերության համաձայնագրի իրականացմանը։ Պետության ղեկավարը նշել է, որ նախագահ Թրամփին նամակ է հղել պաշտպանական-արդյունաբերական և առևտրային ոլորտներում համագործակցության նոր առաջարկներով», – ասվում է հաղորդագրության մեջ։
Ինչպես նշում է ուկրաինական ԶԼՄ-ն, Զելենսկին Վենսի և Ռուբիոյի հետ հանդիպմանը քննարկել է մի քանի թեմաներ։ Մասնավորապես՝ Ուկրաինայի և ՌԴ-ի բանակցությունները Ստամբուլում, Ռուսաստանի դեմ պատժամիջոցները, պաշտպանական համագործակցությունը և Մոսկվայի վրա համատեղ ճնշումը։
«Ռուսաստանի վրա ճնշումը պետք է շարունակվի, քանի դեռ նա պատրաստ չի լինի դադարեցնել պատերազմը։ Եվ, իհարկե, մենք քննարկել ենք մեր համատեղ քայլերը՝ արդար և կայուն խաղաղության հասնելու համար», – նշել է Ուկրաինայի նախագահը։
