Ռուսաստանը հայտարարել է Կուրսկի մարզն ազատագրելու մասին
Ռուսաստանի Դաշնության զինված ուժերի գլխավոր շտաբի պետ Վալերի Գերասիմովը երկրի նախագահ Վլադիմիր Պուտինին զեկուցել է Կուրսկի մարզը ուկրաինական զորքերից ազատագրելու գործողության ավարտի մասին։
Այս մասին հայտնում է «ՌԻԱ Նովոստի»-ն՝ փոխանցելով ՌԴ նախագահի մամուլի քարտուղար Դմիտրի Պեսկովի հայտարարությունը։
«Ռուսաստանի զինված ուժերի գլխավոր շտաբի պետ Վալերի Գերասիմովը Գերագույն գլխավոր հրամանատար Վլադիմիր Պուտինին զեկուցել է Կուրսկի մարզը ուկրաինացիներից ազատագրելու գործողության ավարտի մասին»,-ասել է Կրեմլի խոսնակը։
Վալերի Գերասիմովը նաև հայտնել է, որ Կուրսկի սահմանային գոտում մարտերի ընթացքում Ուկրաինայի զինված ուժերը կորցրել են ավելի քան 76 հազար զինվոր։
2024 թվականի օգոստոսի 6-ի վաղ առավոտյան ուկրաինացի զինվորները ներխուժել էին Կուրսկի մարզ, որոշ ժամանակ անց նրանց առաջխաղացումը կասեցվել էր։ 2025 թվականի մարտի սկզբին ռուսական զորքերը սկսել էին լայնածավալ հակահարձակում մարզը հետ վերցնելու համար։
