Արևմտյան բիզնեսը զգուշավոր հետաքրքրություն է ցուցաբերում ՌԴ վերադառնալու հարցում. FT
Արևմտյան ընկերությունները, որոնք նախկինում լքել էին ռուսական շուկան, առայժմ սահմանափակ հետաքրքրություն են ցուցաբերում ՌԴ վերադառնալու հարցում։ Ոմանք, ովքեր նախկինում ծրագրում էին ամբողջությամբ փակել իրենց բիզնեսը, կասեցրել են այդ գործընթացները։ Այս մասին հայտնում է Financial Times-ը՝ հղում անելով աղբյուրներին։
Պարբերականը նշում է, որ մարտին կենցաղային տեխնիկա արտադրող իտալական «Ariston» ընկերությունը հայտարարել է ռուսական շուկա վերադառնալու մասին։ Դա տեղի է ունեցել այն բանից հետո, երբ նրա ռուսական ստորաբաժանումը հանվել է ժամանակավոր կառավարման մեջ գտնվող ընկերությունների ցանկից։
Հոդվածի հեղինակների կարծիքով՝ ՌԴ իշխանություններն օգտագործում են նման քեյսերը՝ արևմտյան ընկերություններին ներկայացնելու երկիր վերադառնալու հնարավոր սցենարը՝ Ռուսաստանի հետ հարաբերությունները բարելավելու ԱՄՆ նախագահ Դոնալդ Թրամփի ձգտման ֆոնին։
Գործարար շրջանակների աղբյուրները նշում են, որ խոսքը դեռ չափավոր հետաքրքրության զուսպ ազդանշանների մասին է։ Արտասահմանյան որոշ ընկերություններ, որոնք նախկինում սկսել էին ռուսական շուկայից դուրս գալու գործընթացը, այժմ սառեցնում են այդ ծրագրերը՝ հետևելով իրավիճակի զարգացմանը։
Հումքային ոլորտում FT-ի աղբյուրներից մեկը հայտնել է, որ վերջերս Մոսկվայում հանդիպումներ են տեղի ունեցել խոշոր միջազգային թրեյդերների և ռուսական ընկերությունների ներկայացուցիչների միջև: Նկատվել են նաև օտարերկրյա ներդրումային բանկերի պատվիրակություններ։
Այնուամենայնիվ, պարբերականի գնահատականներով, արևմտյան ներդրումների մեծ ներհոսք ՌԴ դեռ չի սպասվում, հատկապես ամերիկյան ընկերությունների կողմից, որոնց բաժնետոմսերը շրջանառվում են ֆոնդային բորսաներում։
