5 միլիոն դրամ՝ Ապարանում «Քաղաքացու օրը» նշելու համար. Փաշինյանի աշխատակազմը պատրաստվում է Փաշինյանի տոնին
Նիկոլ Փաշինյանի աշխատակազմը «Բի Թու Ջի» ՍՊԸ-ից մեկ անձ ընթացակարգով հերթական գնումն է կատարել, որով այս ընկերությանը պատվիրակել է Ապարան քաղաքում կազմակերպել Նիկոլ Փաշինյանի ստեղծած տոնը՝ «Քաղաքացու օր»-ը։
Իսկ ՀՀ «հպարտ քաղաքացիները», հիշեցնենք, Քաղաքացու օրը նշում են ապրիլի վերջին շաբաթ օրը․ 2019 թվականի մարտի 21-ին կառավարությունը հավանություն է տվել «Տոների և հիշատակի օրերի մասին» Հայաստանի օրենքի փոփոխություններին, որոնցում առաջարկվել է սահմանել Քաղաքացու օրը՝ նոր տոն։
Այսպիսով, այս անգամ ապրիլի 26-ին այս ՍՊԸ-ն 4 միլիոն 999,920 դրամով կապահովի Ապարանում համերգային ծրագրի կայացումը՝ «Թմբաթա» և «Տիեզերք» երաժշտական խմբերի մասնակցությամբ։
Թե այս տոնի առթիվ ինչեր են նախատեսված մյուս համայնքներում, դեռ հայտնի չեն․ համապատասխան պայմանագրեր դեռ չեն հանրայնացվել պետգնումների համակարգում։
Մատակարար ընկերության՝ «Բի թու ջի» ՍՊԸ-ի մասին
2023 թվականին Վաղարշապատում գրանցված այս ընկերությունը ստեղծման պահին պատկանել է Անի Թորոսյանին, բայց ամիսներ անց ընկերության 100 տոկոս բաժնեմասի տեր է դարձել Ալիսա Արթուրի Աղաջանյանը:
Ընկերությունը ստեղծումից անմիջապես հետո տասնյակ պայմանագրեր է կնքել պետական տարբեր գերատեսչությունների հետ:
Նշենք, որ նախորդ տարի ապրիլին վարչապետի աշխատակազմը դարձյալ այս ընկերությանն էր վստահել նույն տոնի տոնական օրվա կազմակերպումը Գավառ, Գյումրի, Վանաձոր և Երևան քաղաքներում՝ 4 հարթակների համար հատկացնելով 8 միլիոն 277,600 դրամ։
