Ի՞նչ էր անում ՌԴ դեսպանը վաղ առավոտյան ՀՀ Կառավարությունում
Այսօր վաղ առավոտյան 168.am–ը ֆիքսել է, որ ՀՀ-ում ՌԴ դեսպան Սերգեյ Կոպիրկինը դուրս է գալիս Կառավարության շենքից։
Թե ՌԴ դեսպանն ինչո՞ւ էր վաղ առավոտյան գտնվում Կառավարության շենքում՝ մեզ չհաջողվեց պարզել, քանի որ դեսպանն արագ նստեց մեքենան և հեռացավ։
Հիշեցնենք, հունվարի 15-ին ՀՀ ԱԳ նախարարությունից հայտնել էին, որ ԱԳ նախարարություն է կանչվել ՀՀ-ում Ռուսաստանի դեսպան Սերգեյ Կոպիրկինը: Հանդիպման ընթացքում դեսպանին է հանձնվել համապատասխան բողոքի հայտագիր։
Դեսպանը կանչվել էր ԱԳՆ հունվարի 12-ին ՌԴ համառուսաստանյան պետական հեռուստատեսության եթերում թողարկված «Շաբաթվա լուրեր» հաղորդման առնչությամբ, որի ընթացքում հնչեցվել էին «արհեստականորեն գեներացված խոսույթներ Հայաստանի Հանրապետության ինքնիշխանության և տարածքային ամբողջականության դեմ»։
«Շաբաթվա լուրերի» եթերում հաղորդման հեղինակ Դմիտրի Կիսելյովը խոսել էր, այսպես կոչված, «Զանգեզուրի միջանցքի» նախագծի իրականացման «անհրաժեշտության մասին»։
