Իտալիայի արտգործնախարարը լրագրող Չեչիլիա Սալայի կալանավորման առնչությամբ կանչել է Իրանի դեսպանին
Իտալիայի արտգործնախարար Անտոնիո Տայանին հինգշաբթի կանչել է Հռոմում Իրանի դեսպանին՝ իտալացի լրագրողուհու կալանավորման առնչությամբ, որը երկու շաբաթ առաջ Թեհրանում ձերբակալվելուց հետո մեկուսացված է եղել, հայտնել է Ֆրանսպրես գործակալությունը։
«Կառավարությունը, ինչպես Չեչիլիա Սալայի ձերբակալության առաջին օրվանից ի վեր, անխոնջ աշխատում է նրան տուն բերելու համար, և պահանջում ենք հարգել նրա բոլոր իրավունքները: Մենք չենք լքի Չեչիլիային ու նրա ծնողներին, քանի դեռ նա ազատ չի արձակվել»,- գրել է Տայանին սոցցանցում։
29-ամյա Սալան Իրան է ժամանել դեկտեմբերի 13-ին լրագրողի վիզայով, իսկ դեկտեմբերի 19-ին կալանավորվել է «Իրանի Իսլամական Հանրապետության օրենքները խախտելու համար», հայտարարել են Իրանում օտարերկրյա լրագրողներին վերահսկող և հավատարմագրող Մշակույթի նախարարությունից։
Ըստ իտալական լրատվամիջոցների՝ Սալան չորեքշաբթի հեռախոսազրույցում իր ընտանիքին պատմել է, որ իրեն պահում են մեկուսացման մեջ՝ քնած մի խցի հատակին, որի լույսերը միշտ վառ են։ Թեհրանում Հռոմի դեսպան Պաոլա Ամադեին այցելել է Սալային, սակայն բժշկական սպասարկման փաթեթը, որը նա տվել է պաշտոնյաներին, դրանց թվում՝ աչքի դիմակ՝ քնելիս և հիգիենայի միջոցները, իտալացի լրագրողուհու չեն հանձնվել, հաղորդում են իտալական լրատվամիջոցները:
Տայանին դատապարտել է նրա ձերբակալությունը որպես «անընդունելի»՝ միաժամանակ նշելով, որ Թեհրանի Էվին բանտից նրան ազատելու ջանքերը բարդ են:
