Մոլդովան հունվարից դոլարի փոխարեն եվրո կօգտագործի
2025 թվականի հունվարից Մոլդովան դոլարի փոխարեն որպես բազային արժույթ կօգտագործի եվրոն՝ մոլդովական լեյի պաշտոնական փոխարժեքը սահմանելու համար, հայտարարել է Հանրապետության Ազգային բանկի ղեկավար Անկա Դրագուն:
«Հունվարի 2-ից մենք անցնում ենք եվրոյին՝ որպես բազային արժույթ՝ մոլդովական լեյի և ազգային բանկի պահուստների պաշտոնական փոխարժեքը սահմանելու համար: Դա երկրին զգալի տնտեսական օգուտներ կբերի:
Փոխանակման գործարքների ակնկալվող խնայողությունները կարող են գերազանցել 10 միլիոն եվրոն: Սա պայմանավորված է ներքին շուկայում եվրոյի իրացվելիության ավելացմամբ և առքի ու վաճառքի փոխարժեքների միջև տարբերությունը կրճատելով մոտավորապես 7-10 բանիով (մեկ լեյը 100 բանի է)»,- ասել է Դրագուն։
Ազգային բանկի ղեկավարը պարզաբանել է, որ եվրոյին, որպես հիմնական պահուստային արժույթի, անցնելու որոշումը կապված է երկրի առևտրի և արտարժույթի հոսքերի հետ։ Նրա խոսքով, Մոլդովայի փոխանակումների և առևտրային գործարքների մոտ 60-70%-ը տեղի է ունենում Եվրամիության հետ, ուստի Ազգային բանկը պետք է համապատասխանեցնի պահուստները և արժութային միջամտություններն այս իրողություններին:
