Կապամա
Բաղադրիչները՝
- 800 գ գառան միս
- 400 մլ մսի արգանակ
- 1 մեծ գլուխ սոխ
- 2 մեծ կապ կանաչ սոխ
- 2 մեծ կապ սպանախ
- ձիթապտղի ձեթ
- ալյուր
- կծու, կարմիր աղացած պղպեղ
- աղ, աղացած սև պղպեղ
- 200 գ բնական յոգուրդ՝ ուտեստի հետ մատուցելու համար
Պատրաստման եղանակը
Ոչ մեծ կտորներով կտրտեք գառան միսը, թաթախեք ալյուրի մեջ: Մաքրեք ու մանր կտրատեք գլուխ սոխը: Տաքացրեք արգանակը:
Մեծ, խորը, հաստ հատակով թավայի մեջ մի փոքր ձեթ տաքացրեք: Ուժեղ կրակի վրա բոլոր կողմերից տապակեք մսի կտորները, մինչև ոսկեգույն երանգ ստանալը: Պատրաստի միսը տեղադրեք ափսեի մեջ:
Միսը տապակելուց հետո նույն թավայի մեջ ձեթ ավելացրեք, լցրեք կտրտած սոխը, 3 րոպե տապակեք, միսը նորից լցրեք թավայի մեջ, ավելացրեք տաք արգանակը, հասցրեք եռման աստիճանի: 40 րոպե թույլ կրակի վրա շոգեխաշեք:
Կանաչ սոխն ու սպանախը խոշոր կտրատեք (ցողունները կարող եք հեռացնել կամ թողնել): Կանաչ սոխն ավելացրեք մսով թավայի մեջ, 10 րոպե շոգեխաշեք մսի հետ:
Հետո թավայի մեջ ավելացրեք սպանախը, աղ, կարմիր ու սև պղպեղ արեք, 5 րոպե էլ շոգեխաշեք:
Ուտեստը մատուցեք տաք վիճակում սառը յոգուրդի հետ:
