Որ բժիշկներն են ամենից հաճախ հակաբիոտիկներ նշանակում
Սիբիրի պետական բժշկական համալսարանի գիտնականներն ուսումնասիրել են տարբեր ոլորտների մասնագետների կողմից հակաբակտերիալ թերապիա նշանակելու պրակտիկան և պարզել, թե ինչ հաճախականությամբ են բժիշկները հակաբիոտիկներ օգտագործում իրենց հիվանդներին բուժելու համար:
Հետազոտությունը ցույց է տվել, որ քիթ-կոկորդ-ականջաբանները (ԼՕՌ), ուրոլոգները և կլինիկական դեղաբաններն ավելի հաճախ են հակաբիոտիկներ նշանակում, քան մյուս մասնագետները: Հետազոտության արդյունքները հրապարակվել են Public Health ամսագրում:
Հակաբիոտիկները դեղամիջոցներ են, որոնք օգտագործվում են մարդկանց, կենդանիների և բույսերի վարակների կանխարգելման և բուժման համար: ԱՀԿ-ն այս դեղերի նկատմամբ դիմադրողականությունն անվանել է որպես ամբողջ աշխարհում հանրային առողջությանը սպառնացող տասը գլոբալ սպառնալիքներից մեկը: Բժշկական վերլուծաբանների կարծիքով՝ այս խնդրի լուծման ուղիները նախանշելու համար անհրաժեշտ է ներկա իրավիճակի հստակ պատկերացում։
Սիբիրի պետական բժշկական համալսարանում անցկացված գիտական հետազոտությանը մասնակցել են բժիշկներ Ռուսաստանի տարբեր շրջաններից, ինչպես նաև Բելառուսից, Ղազախստանից և ԱՊՀ այլ երկրներից։ Այդ նպատակով օգտագործվել է էլեկտրոնային հարցաթերթ, որն ուղարկվել է Ռուսաստանի ամենամեծ կրթական բժշկական ռեսուրսի տվյալների բազայի միջոցով։ Ընդհանուր առմամբ, ուղարկվել է ավելի քան 40 հազար հարցաթերթ։
«Վերլուծելով շաբաթական դեղատոմսերի քանակը՝ մենք եկանք այն եզրակացության, որ ամենից հաճախ՝ շաբաթական ավելի քան 10 անգամ, հակաբիոտիկները նշանակվում են ԼՕՌ մասնագետների, ուրոլոգների և կլինիկական դեղաբանների կողմից», – ըստ shantnews-ի՝ ասում է մանկաբուժության ամբիոնի դոցենտ Մարինա Ֆեդոտովան:
