ԱՄՆ-ն Ճապոնիա է տեղափոխում F-35C նորագույն կործանիչներ
![](https://168.am/wp-content/uploads/2024/07/Screenshot_2-35.png)
Միացյալ Նահանգները F-35C Lightning II բազմանպատակ տախտակամածային կործանիչներ է տեղափոխում Ճապոնիա՝ տարածաշրջանում Չինաստանի Ժողովրդաազատագրական բանակի (ՉԺԱԲ) ուժերին դիմակայելու համար: Այս մասին հայտնում է Nikkei Asia հրատարակությունը։
Հրապարակման մեջ ասվում է, որ տարածաշրջանում F-35C ինքնաթիռների տեղակայումն ամերիկյան նավատորմի համար կապահովի մարտավարական առավելություն ՉԺԱԲ-ի նորագույն կործանիչների նկատմամբ, ինչպես նաև կնվազեցնի չինական հականավային հրթիռների կողմից սպառնալիքը ԱՄՆ-ի և Չինաստանի միջև հիպոթետիկ բախման դեպքում։
Հուլիսի 15-ին ԱՄՆ ռազմածովային ուժերը հայտնել են F-35C Lightning II կործանիչներ և CMV-22B Osprey կոնվերտոպլաններ Ճապոնիայի Իվակունի ռազմակայան տեղափոխելու մասին։ Ինքնաթիռները կմտնեն «Ջորջ Վաշինգտոն» ատոմային ավիակրի ավիախմբի կազմի մեջ, որը Ճապոնիա կժամանի մինչև ընթացիկ տարվա վերջը, որպեսզի փոխարինի այնտեղ մշտապես տեղակայված մեկ այլ ամերիկյան ավիակրի՝ «Ռոնալդ Ռեյգանին»: ԱՄՆ ռազմածովային ուժերի ներկայացուցիչը Nikkei Asia-ին հայտնել է, որ F-35C-երի էսկադրիլիաներ են տեղակայված նաև «Կառլ Վինսոն» և «Աբրահամ Լինքոլն» ավիակիրների վրա, որոնց պատասխանատվության գոտու մեջ է մտնում Ասիա-խաղաղօվկիանոսյան տարածաշրջանը:
F-35-երը հինգերորդ սերնդի գերձայնային կործանիչներ են։ Դրանք ներկայացված են երեք հիմնական մոդիֆիկացիաներով՝ F-35A (ստանդարտ թռիչք և վայրէջք), F-35B (ուղղահայաց թռիչք և վայրէջք) և F-35C (արձակում ավիակիրների տախտակամածից)։
Այս տարի ԱՄՆ-ից F-35-երի գնման գործարքներ են կնքել Իսրայելը և Լեհաստանը, շուտով դրանք նախատեսում է ձեռք բերել Հունաստանը: