Բրիտանիան Հայաստանի հետ բանակցում է ապօրինի ներգաղթյալներին արտաքսելու օրինագծի շուրջ. Երևանն ակնկալում է առնվազն 290 մլն ֆունտ ստեռլինգ ստանալ. The Times
Բրիտանական ԱԳՆ-ն Հայաստանի և մի քանի այլ երկրների ներկայացուցիչների հետ բանակցություններ է սկսել ապօրինի ներգաղթյալներին արտաքսելու օրինագծի շուրջ: Տեղեկությունը հայտնում է բրիտանական The Times-ը։
«Մեծ Բրիտանիան Հայաստանի, Կոտ դ’ Իվուարի, Կոստա Ռիկայի և Բոտսվանայի հետ բանակցում է միգրանտներին Ռուանդա արտաքսելու սխեման կրկնելու շուրջ»,-ասվում է հրապարակման մեջ, որում հղում է արվում բրիտանական ԱԳՆ-ի արտահոսած փաստաթղթերին:
Ըստ ԶԼՄ-ների` նշված փաստաթղթերի բովանդակությունը կապված է վերջին 18 ամիսների ընթացքում բրիտանական կառավարության աշխատանքի հետ՝ գտնելու այն երկրները, որոնք կարող են շահագրգռված լինել Ռուանդայի սխեմայի կրկնությամբ: Նշված չորս երկրների հետ աշխատանքը Բրիտանիայի կողմից առաջնային ուշադրություն է պահանջում։
Հաղորդվում է, որ համագործակցությունը քննարկվել է այնպիսի երկրների հետ, ինչպիսիք են Էկվադորը, Պարագվայը, Պերուն, Բրազիլիան և Կոլումբիան, բայց նրանք, ըստ բրիտանական իշխանությունների, ավելի քիչ են հետաքրքրված այդ համաձայնագրով, իսկ Մարոկկոն, Թունիսը, Նամիբիան և Գամբիան ակնհայտորեն հրաժարվել են քննարկումներից։
Հրապարակման մեջ նաև ասվում է, որ Հայաստանի, Կոտ դ’Իվուարի, Կոստա Ռիկայի և Բոտսվանայի հետ բանակցությունների առաջընթացը կանգ է առել Ռուանդայի հետ համաձայնագրի հետ կապված շարունակական խնդիրների պատճառով, սակայն կառավարությունը հուսով է, որ բանակցությունները կարող են վերսկսվել, հենց որ Ռուանդայի սխեման գործարկվի:
Հունվարին համայնքների պալատը (Մեծ Բրիտանիայի խորհրդարանի ստորին պալատը) վերջնական ընթերցմամբ ընդունեց փախստականներին Ռուանդա արտաքսելու մասին օրենքը՝ չնայած պատգամավորների շրջանում լուրջ տարաձայնություններին: Այժմ տեքստը պետք է քննարկվի Լորդերի պալատում։
Նշվում է նաև, որ Հայաստանն ակնկալում է այս գործարքից ստանալ առնվազն 290 միլիոն ֆունտ ստեռլինգ:
