Լատվիայի ԱԳՆ-ն նախարարներին հետախուզում հայտարարելու պատճառով կանչել է ՌԴ գործերի ժամանակավոր հավատարմատարին
Լատվիայի արտաքին քաղաքական գերատեսչությունը կանչել է Լատվիայում ՌԴ գործերի ժամանակավոր հավատարմատար Օլեգ Զիկովին՝ կապված ՌԴ ՆԳՆ-ի կողմից լատվիացի մի քանի նախարարների հետախուզում հայտարարելու հետ: Ինչպես տեղեկանում ենք ՏԱՍՍ գործակալությունից, այդ մասին ասվում է հանրապետության արտաքին քաղաքական գերատեսչության կայքում հրապարակված հայտարարության մեջ։
«2024 թվականի փետրվարի 14-ին Ռուսաստանի Դաշնության դեսպանատան գործերի ժամանակավոր հավատարմատար Օլեգ Զիկովը կկանչվի Լատվիայի արտաքին գործերի նախարարություն՝ նրա բացատրություններն ստանալու Լատվիայի նախկին և գործող պետական ծառայողների` բաց հասանելիությամբ հրապարակված ցուցակի վերաբերյալ, որոնց դեմ Ռուսաստանը քաղաքական դրդապատճառներով մեղադրանքներ է առաջադրել»,- ասվում է փաստաթղթում։
Փետրվարի 13-ին Ռուսաստանի ՆԳՆ-ն քրեական հոդվածով հետախուզում է հայտարարել Լատվիայի արդարադատության նախարար Ինես Լիբինյու Էգներին, ֆինանսների նախարարության ղեկավար Արվիլս Աշերադենսին և հողագործության նախարար Արմանդս Կրաուզեին։ Հետախուզում է հայտարարվել նաև Էստոնիայի վարչապետ Կայա Կալլասին, Էստոնիայի պետքարտուղար Տայմար Պետերկոպին և Լիտվայի մշակույթի նախարար Սիմոնաս Կայրիսին։ Իրավապահ մարմինները ՏԱՍՍ-ին հայտնել են, որ նրանք հետախուզվում են խորհրդային զինվորների հուշարձանների ոչնչացման և վնասման քրեական գործի շրջանակներում։
2022 թվականի մայիսի 13-ին Լատվիայի Սեյմը օրենք է ընդունել, որով կասեցվում է Ռուսաստանի հետ հուշակոթողների և հուշարձանների մասին երկկողմ համաձայնագրի 13-րդ հոդվածի գործողությունը։ Այս հոդվածը Մոսկվային և Ռիգային պարտավորեցնում էր անվնաս պահել հուշահամալիրներն ու զինվորների գերեզմանները, ինչպես նաև ապահովել դրանց խնամքն ու բարեկարգումը։ Խորհրդարանի որոշումն ազատություն է տվել Լատվիայի իշխանությունների ձեռքերին`քանդելու, այդ թվում՝ խորհրդային բանակի զինվորների՝ գերմանաֆաշիստական զավթիչներից Խորհրդային Լատվիան և Ռիգան ազատագրողների հուշարձանը։ Քվեարկության ժամանակ Սեյմի պատգամավորներ էին հանդիսանում Աշերադենսը, Լիբինյա Էգները, Կրաուզեն։
