ԵՄ-ն մտադիր է կայուն հարաբերություններ կառուցել Պեկինի հետ․ մեկնարկել է ԵՄ-Չինաստան գագաթնաժողովը
ԵՄ-ն ցանկանում է, որ իր հարաբերությունները Չինաստանի հետ լինեն կայուն և փոխշահավետ։ Այդ մասին Պեկինում ԵՄ-Չինաստան գագաթնաժողովում հայտարարել է Եվրոպական խորհրդի նախագահ Շառլ Միշելը Չինաստանի նախագահ Սի Ծինփինի հետ հանդիպմանը։
«Մենք միասնական ենք Չինաստանի հետ կայուն և փոխշահավետ հարաբերությունների կառուցման ուղղությամբ շարժվելու հարցում», – ասել է Միշելը։
ԵՄ-Չինաստան գագաթնաժողովին նաև ներկա են եղել Եվրահանձնաժողովի նախագահ Ուրսուլա ֆոն դեր Լայենը և ԵՄ արտաքին քաղաքական ծառայության ղեկավար Ժոզեպ Բորելը։ ԵՄ ներկայացուցիչների ելույթների տեսագրությունը ֆոն դեր Լայենը հրապարակել է X սոցիալական ցանցի իր էջում:
Եվրահանձնաժողովի ղեկավարն իր ողջույնի խոսքում նշել է, որ ուրախ է գագաթնաժողովում մտքերի անկեղծ փոխանակման հնարավորություն ունենալու համար։
«Մենք կքննարկենք, թե ինչպես հավասարակշռել մեր տնտեսական հարաբերությունները», – ասել է նա։
Ուրսուլա ֆոն դեր Լայենն ընդգծել է, որ Չինաստանը ԵՄ-ի ամենակարևոր տնտեսական գործընկերն է, սակայն նրա հետ հարաբերություններում «կան ակնհայտ անհավասարակշռություններ և տարբերություններ, որոնք մենք պետք է վերացնենք»։
Իր հերթին Չինաստանի կենտրոնական հեռուստատեսությունը հաղորդել է, որ երկրի նախագահ Սի Ծինփինը Եվրոպական խորհրդի ղեկավար Շառլ Միշելի և Եվրահանձնաժողովի նախագահ Ուրսուլա ֆոն դեր Լայենի հետ հանդիպմանը նշել է, որ ՉԺՀ-ն և Եվրամիությունը պետք է ամրապնդեն փոխադարձ քաղաքական վստահությունը և կանխեն արտաքին միջամտությունը համատեղ երկկողմ փոխգործակցության մեջ:
«ՉԺՀ-ն և ԵՄ-ն պետք է գործընկերներ լինեն փոխշահավետ համագործակցության բնագավառում, մշտապես ամրապնդեն փոխադարձ քաղաքական վստահությունը և հասնեն ռազմավարական փոխհամաձայնության»,- ընդգծել է նա:
Դեկտեմբերի 7-ին Պեկինում մեկնարկել է Եվրամիության և Չինաստանի ղեկավարների՝ վերջին գրեթե հինգ տարվա ընթացքում առաջին առկա ձևաչափով գագաթնաժողովը, որի օրակարգի հիմնական կետերը, բացի երկկողմ հարաբերություններից, կլինեն նաև Ուկրաինայում և Մերձավոր Արևելքում հակամարտությունները։
