Բոլիվիայում ԱՄՆ նախկին դեսպան Մանուել Ռոչային ձերբակալել են հօգուտ Կուբայի լրտեսելու մեղադրանքով
Մայամիում ձերբակալել են Բոլիվիայում ԱՄՆ նախկին դեսպան Մանուել Ռոչային, ով մեղադրվում է հօգուտ Կուբայի լրտեսելու համար: Այդ մասին հայտնում է Associated Press լրատվական գործակալությունը:
73-ամյա ամերիկացի նախկին դիվանագետը ձերբակալվել է դեկտեմբերի 1-ին ԱՄՆ հետաքննությունների դաշնային բյուրոյի անցկացրած երկարատև հետաքննությունից հետո:
Ռոչայի 25-ամյա դիվանագիտական գործունեությունը հիմնականում անցել է Հարավային Ամերիկայում:
Սառը պատերազմի տարիներին նա պաշտոնավարել է Կուբայում, որի հետ Միացյալ Նահանգները Ֆիդել Կաստրոյի նախագահության օրոք դիվանագիտական լիակատար հարաբերություններ չի ունեցել:
1997-ից 2000 թվականներին Ռոչան ղեկավարել է ԱՄՆ դեսպանությունն Արգենտինայում, ապա այդ պաշտոնն է ստանձնել Բոլիվիայում:
Թոշակի անցնելուց հետո Ռոչան տեղափոխվել է մասնավոր բիզնեսի ոլորտ և աշխատել է ոսկու արդյունահանմամբ և ածխի արտահանմամբ զբաղվող ընկերություններում:
