Տարօրինակ է՝ 2 օրվա մեջ 35 մեքենա է վերադարձվում. ԵԱՏՄ շրջանակներում հրատապ խորհրդակցություն ենք հրավիրել. Վահան Քերոբյան
Էկոնոմիկայի նախարար Վահան Քերոբյանի փոխանցմամբ՝ ուսումնասիրում են «Ռոսսելխոզնադզոր»-ի հրապարակած նյութերը՝ հասկանալու համար, թե ինչքանով են հայ տնտեսվարողների արտադրած ապրանքներն անհամապատասխան այն կարգավորումներին, որոնք ՌԴ-ն կիրառում է։
«Մեզ համար ուղղակի տարօրինակ է, որ մեկ ամբողջ տարվա մեջ 35 մեքենա է վերադարձվում, հետո 2 օրվա մեջ կրկին այդքան մեքենա է վերադարձվում, այն դեպքում, երբ մենք՝ կարգավորումների, մատակարարները՝ իրենց որակավորումների մեջ որևէ փոփոխություն չեն արել»,- ԱԺ-ում լրագրողների հետ զրույցում ասաց Վահան Քերոբյանը։
Ըստ նախարարի, Հայաստանը ԵԱՏՄ շրջանակներում որոշակի գործողություններ է սկսել՝ հրավիրվել է հրատապ խորհրդակցություն, որը տեղի կունենա առաջիկա երկու օրերի ընթացքում։
«Ցանկացած տնտեսվարող ինքը ևս պետք է գնահատի, եթե ինքն ունի մի գնորդ մեկ երկրում, ապա այդտեղ կա մեկ գնորդի ռիսկ, կամ մեկ երկրի ռիսկ։ Օրինակ, շատ խոհեմ կլինի, եթե ցանկացած երկիր արտահանման չափը չգերազանցի 20 տոկոսը»,- շեշտեց Վահան Քերոբյանը։
