Իսրայելի RAFAEL ընկերությունը հայտնել է գերձայնային հրթիռների կալանման համակարգի մշակման մասին
Իսրայելի RAFAEL պաշտպանական ընկերությունը հայտարարել է գերձայնային հրթիռների կալանման համակարգի մշակման աշխատանքի մասին։ Այդ մասին նշվում է ընկերության տարածած հաղորդագրությունում:
Ընկերությունը հայտնում է, որ համակարգը կառուցվել է՝ որպես «բեկումնային պաշտպանական պատասխան գերձայնային հրթիռների աճող սպառնալիքին»:
Նախագիծն ստացել է Sky Sonic անվանումը։ RAFAEL-ի ներկայացուցիչներն առայժմ հրաժարվում են հայտնել ծրագրի իրականացման կոնկրետ ժամկետները, բայց ընդգծում են, որ պաշտպանական կոնցեռնի ինժեներներն առաջավոր համակարգի ստեղծման վրա աշխատում են արդեն մի քանի տարի։
RAFAEL ընկերությունն է մշակել «Երկաթե գմբեթ» և «Դավթի պարսատիկ» հակահրթիռային պաշտպանության համակարգերը, ինչպես նաև «Երկաթե շող» նորագույն լազերային համակարգը: Ընկերության ղեկավար Յուվալ Շտայնիցը պնդում է, որ Sky Sonic-ի համակարգը հիմնված է եզակի տեխնոլոգիայի վրա, որն իր տրամադրության տակ ունի RAFAEL-ը։
Ընթացիկ մշակումները RAFAEL-ը ծրագրում է ներկայացնել արդեն հաջորդ շաբաթ՝ Փարիզի Լը Բուրժե միջազգային ավիատիեզերական սրահում։
Իսրայելական ընկերությունը նման համակարգի մշակման մասին հայտարարությունն անում է այն բանից հետո, երբ օրեր առաջ Իրանի իշխանությունները ներկայացրին Fattah նոր գերձայնային բալիստիկ հրթիռը:
