Թե Հրաչն ինչ գիտի՝ ագրեսորն ինչ ա…
Երկու օր առաջ ԱԺ «Քաղաքացիական պայմանագիր» խմբակցության անդամ, Նիկոլ Փաշինյանի աներձագ Հրաչ Հակոբյանն «Ազատություն» ռադիոկայանի հեռուստաեթերում պատասխանելով ֆեյսբուքյան օգտատերերի հարցերին, իր պատկերացմամբ հետաքրքիր համեմատություն էր արել.
«Երբ տեղի ունեցավ 44-օրյա պատերազմը, մենք էդ հակամարտության մեջ, կարելի է համեմատական տանել, էսպես, աշխարհի աչքերում մենք Ռուսաստանն էինք, Ադրբեջանը էդ ժամանակ Ուկրաինան էր, և աջակցությունը միջազգային հանրության էդ ձևով էր տրվում մեզ, այսինքն՝ մեզ մեղադրում էին՝ որպես… իրենց աչքերում համենայն դեպս մենք ագրեսոր երկիր էինք, որը գրավել է այլ երկրի տարածքներ»,- հայտարարել է աներձագ ՔՊ-ական պատգամավորը:
Տարօրինակ զուգադիպությամբ Թուրքիան և Ադրբեջանը ևս ջանք չեն խնայում Հայաստանը որպես ագրեսոր պետություն ներկայացնելու ուղղությամբ:
Վերջերս ՀՀ նախկին փոխարտգործնախարար Շավարշ Քոչարյանը «Պրեսսինգ» հաղորդաշարում մանրամասն պարզաբանել https://168.am/2022/11/09/1793710.html էր, թե գործող իշխանությունները Ալիև-Էրդողան տանդեմի հետ ինչ վտանգավոր «խաղեր են» խաղում մեր պետության գլխին՝ Հայաստանը ներկայացնելով որպես ագրեսոր երկիր, և թե ինչ սարսափելի և կործանարար հետևանքներ դա կունենա.
«Եթե խնդիրը վերաբերում է ինքնորոշմանը, ապա ստացվում է, որ ագրեսորն Ադրբեջանն է, որը, ի պատասխան Արցախի ժողովրդի իրացված ինքնորոշման՝ դիմել է ուժային քաղաքականության, ինչը սկզբից արտահայտվել է բռնի տեղահանումներով, զանգվածային ջարդերով՝ Սումգայիթ, Բաքու, և այլն, և լայնածավալ ռազմական ագրեսիայով՝ ինքնորոշված ԼՂ-ի դեմ։ Եթե Հայաստանը կամովին հրաժարվում է ինքնորոշումից, նշաձողն իջեցնում է, դա ոչ այլ ինչ է, քան ինքն իր վրա վերցնում է «ագրեսորի» պիտակը: Ագրեսորը պետք է պատժվի, առաջինը` ագրեսոր պետության էթնիկ բնակչության վտարումը, բռնի տեղահանումն է. ամենատիպիկ օրինակը Գերմանիան է (Երկրորդ աշխարհամարտից հետո տարբեր երկրներից տեղահանված գերմանացիների թիվը 12-14 միլիոն էր): Երկրորդ՝ տարածքներով հատուցում. բազմաթիվ այդպիսի նախադեպեր (Երկրորդ համաշխարհային պատերազմից հետո Գերմանիան) կան: Փաստ եմ արձանագրում, որ եթե կա վնաս, որի համար պետք է փոխհատուցել գումարով կամ այլ միջոցով, դրա փոխարեն կարող է պահանջվի տարածք: Հաջորդը՝ ռեպարացիաներ. եթե միջազգային իրավունքը խախտվել է որևէ սուբյեկտի կողմից, ապա այն վնասը, որը հասցրել է, պետք է փոխհատուցվի, առավելևս՝ ագրեսիայի դեպքում: Թուրքիան և Ադրբեջանն իրենց բոլոր քայլերն ուղղել են Հայաստանը որպես ագրեսոր պետություն ամրագրելու և պատժելու գործընթացին, և ցավալին այն է, որ այդ գործում իրենց աջակից է ՀՀ ներկա իշխանությունը»,- հայտարարել էր ՀՀ նախկին փոխարտգործնախարարը:
Շավարշ Քոչարյանը չէր սխալվում. Հայաստանի գործող իշխանությունները՝ ի դեմս Նիկոլ Փաշինյանի և նրա թիմակիցների, հրաժարվելով Արցախի ինքնորոշման իրավունքից, համաձայնում են Ալիև-Էրդողան տանդեմի կողմից տարվող քարոզչության հետ, որի արդյունքում միջազգային հանրության մի զգալի հատված համարում է, որ Արցախում Հայաստանն ագրեսոր է եղել:
