Շիրակի մարզպետարանում շտաբային ուսումնավարժանք է անցկացվել
Շիրակի մարզպետարանում հոկտեմբերի 19-ին անցկացվեց «ՀԱԷԿ-ի միջուկային և (կամ) ճառագայթային վթարների դեպքում Արմավիր քաղաքից Գյումրի քաղաք տարհանված բնակչության ընդունման և տեղաբաշխման կազմակերպումը» թեմայով շտաբային ուսումնավարժություն, որին մասնակցել են մարզպետարանի, Շիրակի մարզային փրկարարական վարչության ստորաբաժանումների ու մարզային մի շարք ծառայությունների ղեկավարներ և պատասխանատուներ։
Ուսումնավարժության կարևորությանն է անդրադարձել Շիրակի մարզպետ Նազելի Բաղդասարյանը՝ վարժանքների պատասխանատուներին հորդորելով լինել առավել զգոն և ուշադրություն դարձնել պլանով նախատեսված յուրաքանչյուր գործողության։
Մարզպետի որոշմամբ՝ ուսումնավարժության ղեկավար է նշանակվել փոխմարզպետ, Շիրակի մարզի բնակչության տարահանման հանձնաժողովի նախագահ Կարեն Մանուկյանը, ուսումնավարժության ղեկավարման շտաբի պետ է նշանակվել փրկարար ծառայության Շիրակի մարզային փրկարարական վարչության պետ Ալեքսան Գյոզալյանը:
Համաձայն ուսումնամարզանքի ծրագրի՝ ՀԱԷԿ ռեակտորի հովացման համակարգի առաջնային ուրվագծում առաջացել է ջրի արտահոսք, և տեխնոլոգիական պարամետրերը դուրս են եկել անվտանգ շահագործման սահմաններից, անհրաժեշտություն է առաջացել Արմավիր քաղաքի բնակչությանը տարհանել և ժամանակավորապես վերաբնակեցնել Գյումրի քաղաքում: Ելնելով ստեղծված իրավիճակից և համաձայն ստացված ներմուծականների՝ բոլոր ծառայությունների և մարզային տարահանման հանձնաժողովի կողմից առանձին զեկույցներով ներկայացվել են իրականացվելիք գործողությունները։
Ուսումնավարժանքի նպատակն է ստուգել և կատարելագործել մասնակիցների հմտություններն ու ունակությունները ՀԱԷԿ-ի միջուկային և ճառագայթային վթարների դեպքում Արմավիրից Գյումրի տարհանված բնակչության ընդունման և տեղաբաշխման կազմակերպման և իրականացման գործում, ստուգել «ՀԱԷԿ-ի միջուկային և (կամ) ճառագայթային վթարների դեպքում ՀՀ Շիրակի մարզային տարահանման հանձնաժողովի պլանի» իրատեսությունը և կատարելագործել համագործակցությունը կառավարման մարմինների, կազմակերպությունների միջև:
