Ո՞վ է զբաղվում Մխիթարյանի և մյուս աստղերի տրանսֆերային գործերով Մինո Ռայոլայի մահից հետո
Օրերս շատ ակտիվ քննարկվում էր Արսեն Զախարյանի՝ «Չելսի» հավանական տեղափոխությունը, ինչը սակայն իրականություն չդարձավ։ Զախարյանի տեղափոխությունը «Չելսի» իրականացնում էր Ռայոլայի կայսրության խորհրդավոր ժառանգորդուհին, ում Պոգբան անվանում է իր երկրորդ մայր։
Ռաֆայելա Պիմենտան այն կինն է, ով դարձել է Agency One-ի ղեկավարը Մինո Ռայոլայի մահից հետո։ Նա ժառանգել է գերաստղերի ցուցակը՝ Մխիթարյան, Իբրահիմովիչ, Հոլանդ, Պոգբա, Դե Լիգտ, Վերատի, Դոննարումմա և մի քանի տասնյակ այլ խաղացողներ: Ըստ Ջանլուկա Դի Մարցիոյի՝ Պիմենտան այժմ զբաղվում է Արսեն Զախարյանի՝ «Չելսի» տեղափոխությամբ։
Ռաֆայելան համատեղում է միստիկան (խուսափում է հարցազրույցներից և չի պահպանում սոցիալական ցանցերը) տրանսցենդենտալ կարևորության հետ՝ Անգլիայում նրան անվանում են «ամենակարևոր ֆուտբոլային մարդ, որի մասին ոչ ոք չգիտի»:
Տեղեկատվության հազվագյուտ աղբյուր է The Athletic-ի հունիսյան տեքստը: Լրագրողները զրուցել են Ռայոլայի հաճախորդների և այլ գործակալների հետ և կազմել Ռաֆայելա Պիմենտայի լայնաֆորմատ դիմանկարը։
Պիմենտան հարուստ կենսագրություն ունի՝ նա միջազգային իրավունքի պրոֆեսոր էր և աշխատում էր հակամենաշնորհային բաժնում
Ռաֆայելան ծնվել և մեծացել է Սան Պաուլոյում, որտեղ համալսարանում սովորել է իրավաբանություն։ Goal.com-ը գրում է, որ նա ֆուտբոլ է խաղացել։ Համալսարանից հետո աղջիկը ակադեմիական կարիերա է կառուցել և եղել է միջազգային իրավունքի պրոֆեսոր, միաժամանակ աշխատել է պետական ծառայության մեջ։
1990-ականների կեսերին նա աշխատել է Բրազիլիայի այն ժամանակվա նախագահ Ֆերնանդո Հենրիկե Կարդոսոյի կողմից ստեղծված հակամենաշնորհային մարմնում: Ռաֆայելայի ամուսնական կարգավիճակի և նույնիսկ տարիքի մասին ոչինչ հայտնի չէ։
Ռաֆայելան պատահաբար հայտնվեց պրոֆեսիոնալ ֆուտբոլում. 1998 թվականին Ռիվալդոն և Սեզար Սամպայոն հիմնեցին «Գուարինգուետա» ակումբը։ Իրավական մասով նրանց օգնել է Ռաֆայելան։ Բարեգործական հանդիպմանն ու բուֆետին հրավիրված էին հյուրեր Եվրոպայից, որոնց թվում էր նաև Մինո Ռայոլան։ Հայտնի չէ, թե ինչ են խոսել նա և Ռաֆայելան, սակայն այդ պահից Մինոն դիմել է աղջկան իրավական օգնության համար։ Իսկ 2004 թվականին Մինոն նրան հրավիրեց իր գործակալություն: Հանուն նոր մարտահրավերի՝ Ռաֆայելան Սան Պաուլոյից տեղափոխվեց Մոնակո, որտեղ հիմնված է Raiola’s One ընկերությունը։
Ռաֆայելային անվանում են շատ կոշտ բանակցող։ Բայց նա ցնցումներ չի սիրում և Ռայոլայի բանակցությունները Ֆերգյուսոնի հետ մղձավանջ է համարում։
Ռաֆայելան, որպես բարձրակարգ մասնագետ, անմիջապես ընդունվեց աշխատակազմում։ Դա շատ հազվադեպ է պատահում՝ Մինոն ընտրեց ճիշտ մարդկանց այն երկրից, որտեղ նա բիզնես էր անում, և չորս-հինգ հոգի նստեցին գրասենյակում: Նրանց թվում է Վինչենցո Ռայոլան՝ Մինոյի զարմիկը, ով կենտրոնացած է իտալական շուկայի վրա։ Մնացածը խաղացողների անձնական օգնականներ են կամ PR մարդիկ։
Կարող եք մտածել, որ Ռաֆայելան սովորական իրավաբան է, ով միայն փաստաթղթերով է զբաղվում: Առաջին տարիներին այդպես էր, բայց 2012 թվականին Մինոն նրան հանձնարարեց բանակցել «Յուվենթուսի» հետ Պոգբայի պայմանագիր կնքելու շուրջ։ Ռաֆայելան հաղթահարեց, իսկ հետո նրան ավելի ու ավելի էին վստահում երիտասարդ խաղացողների հետ կապված բանակցությունները՝ նա միանշանակ ներգրավված էր Միտչել Բակերի՝ ՊՍԺ-ից «Բայեր» և Խավի Սիմոնսի՝ «Բարսայից» ՊՍԺ տեղափոխություններին: Մինոն նրա հետ խորհրդակցել է նաև ամենաշատ կարգավիճակ ունեցող խաղացողների վերաբերյալ և տարել բանակցությունների։
«Նա և Մինոն միշտ կատարյալ հավասարակշռություն են ունեցել»,- The Athletic-ին ասել է անանուն գործակալը:-«Մինոն վատ ոստիկան էր, բայց չի կարելի ասել, որ Ռաֆայելան լավն էր: Նա նույնպես կոշտ է: Մենք զգացինք, որ Ռայոլայի թիկունքում շատ խելացի մարդ կա։ Մինոն հարգում էր նրան, և նա խորասուզված էր հաճախորդների գործերի մեջ»։
Որոշ առումներով Ռաֆայելան նման չէ Ռայոլային։ Հիշում ենք Մինոյի ոճը՝ նա անվերջ գովաբանում էր հաճախորդներին և բարկանում, եթե նրանք վիրավորվում էին։ Նա Գվարդիոլային վախկոտ է անվանել Իբրահիմովիչի նկատմամբ իր վերաբերմունքի համար, իսկ Կլոպին` «խայտառակություն» Բալոտելիին պահեստայինների նստարանին պահելու համար:
Ռայոլան այնքան գնահատեց Ռաֆայելային, որ նա առաջարկեց հավասար գործընկերություն իր գործակալությունում: Մյուս աշխատակիցներից ոչ մեկին (նույնիսկ Ռայոլայի բարեկամին) նման իրավունք չի տրվել։ Հավանաբար, Մինոն կնոջը տեսնում էր որպես իրավահաջորդ։
Գործընկերները Ռաֆայելային գնահատում են որպես շատ ու շատ կարևոր գործիչ։ Պիմենտային հաճախ անվանում են «այժմ ֆուտբոլի ամենահզոր կինը»։
Իսկ խաղացողները Ռայոլայի մահից հետո չե՞ն հեռանա
2022 թվականի գարնանը Ռայոլան թոշակի անցավ հիվանդության պատճառով, իսկ Ռաֆայելան ստանձնեց հիմնական գործարքները։
Ինչպես հայտնում է The Athletic-ը, հենց Պիմենտան է հեռախոսով քննարկել Հոլանդի պայմանագրի փոքր մանրամասները «Սիթիի» պաշտոնյաների հետ: Գարնանից նա աշխատում է «Բավարիա» և «Այաքսի» եզրային պաշտպան Նուսաիր Մազրաուի տեղափոխության վրա:
Ապրիլի 30-ին Ռայոլան մահացավ, և Պիմենտան այժմ միայնակ է ղեկավարում գործակալությունը: Հիմնական հարցն այն է, թե արդյոք նա կկարողանա՞ լիովին փոխարինել Ռայոլային և պահպանել առաջատար հաճախորդներին:
«Նրա համար անհավանական դժվար կլինի: Քանի որ այս բիզնեսը խիստ կապված է կոնկրետ անհատների հետ: Այնուամենայնիվ, գործակալներն իրենք այսբերգի գագաթն են, շատ բան կախված է թիմից»,- EFE-ին ասել է իսպանական ֆուտբոլային գործակալների ասոցիացիայի ղեկավար Պեդրո Բրավոն:
The Athletic-ը, անանունության պայմանով, հրապարակել է մի քանի ֆուտբոլային գործակալների կարծիքներ։ Ինչ-որ մեկը կարծում է, որ ֆուտբոլում հավատարմություն չկա՝ խաղացողները Պիմենտեին կտան մեկ կամ երկու տրանսֆերային պատուհանի փորձաշրջան, եթե հիասթափվեն, կսայթաքեն մեկ այլ գործակալի մոտ: Մեկ այլ աղբյուր հայտնել է, որ ֆուտբոլիստները հարգում են Ռաֆայելային։ Գործակալներից մեկը փոխանցել է «Վեսթ Հեմի» դարպասապահ Ալֆոնսո Արեոլայի խոսքերը՝ ֆրանսիացին կմնա Պիմենայի հետ, նա համոզված է, որ ոչ ոք չի կարող իր կարիերան Պրեմիեր լիգայում նրանից լավ զարգացնել։ Կորուստներից միայն Մարկուս Թուրամն է, բայց նա հեռացավ Մինոյի մահից առաջ:
Սիրարփի Աղաբաբյան
