«Եթե դեռևս չեն ընկալել վտանգը, ապա…». Կարեն Ճշմարիտյան
ՀՀ էկոնոմիկայի նախկին նախարար Կարեն Ճշմարիտյանը ֆեյսբուքյան իր էջում գրել է. «Աշխարհով մեկ այս կառավարելի քաոսն առայժմ միայն տեսանելի հատվածն է։
Ռուսաստանի Դաշնության դեմ իրացվող պատժամիջոցները հարվածելու են ոչ միայն Ռուսաստանի, այլև իրենց հերթին՝ Եվրոպայի, Ասիայի երկրների և ԱՄՆ-ի տնտեսություններին։
Աշխարհի առաջատար տնտեսությունների համար սա հերթական ցնցումն է, որի ալիքը պարտադիր հասնելու է, և հարվածելու է առևտրատնտեսական ու ֆինանսական շուկաներին ինտեգրված համարյա բոլոր երկրներին, և անշուշտ՝ Հայաստանին։
Տվյալ պայմաններում, եթե դեռևս առկա են պատասխանատու «խելոքներ», ովքեր հույս ունեն, որ այդ ալիքը կշրջանցի Հայաստանը, ապա՝ կարելի է միայն կարեկցել մեր գործարարներին ու ժողովրդին։
Եթե դեռևս չեն ընկալել վտանգը, ապա թող ոչ թե առավել ազատականացնեն և մտածեն տնտեսության խոցելի ոլորտներին աջակցելու մասին, այլ շարունակեն աջակցել բանկերին, ավելացնեն առկա տնտեսական խղճուկ ակտիվությունը նվազեցնող, և աշխարհի տարբեր ծայրամասերից «թխած» անիմաստ ու ձևական օրենսդրական սահմանափակումները՝ QR կոդ, կանխիկ առևտրի, ծխելու, և «զոմբի» «ֆինանսիստների» հեղինակած այլ ձևամոլությունները։ Իսկ եթե ֆանտազիաները չբավարարի,ապա՝ կարելի է հուշել այնպիսի սահմանափակումներ, որոնք այդ ալիքի ժամանակ վերջնական շնչահեղձ կանեն այսքան ժամանակ դիլետանտության, համավարակի ու պատերազմի պատճառով ժամանակ առ ժամանակ խռխռացող տնտեսությունը»։
