ՌԴ և Ադրբեջանի միջև հռչակագիրը հավելյալ հնարավորություններ կստեղծի եռակողմ հայտարարության կյանքի կոչման համար. Վահան Հունանյան
Մոսկվայի և Բաքվի միջև դաշնակցային փոխգործակցության մասին հռչակագրի ստորագրումը կարող է հավելյալ հնարավորություններ ստեղծել Հայաստանի, Ռուսաստանի և Ադրբեջանի ղեկավարների կողմից եռակողմ հայտարարությունների կյանքի կոչման համար: Այս մասին ՏԱՍՍ-ին ասել է ՀՀ արտգործնախարարության մամուլի քարտուղար Վահան Հունանյանը:
«Հուսով ենք, որ Ռուսաստանի և Ադրբեջանի միջև հռչակագրի ստորագրումը կստեղծի հավելյալ հնարավորություններ՝ կյանքի կոչելու Հայաստանի. Ռուսաստանի և Ադրբեջանի առաջնորդների կողմից ստորագրված հայտարարությունների կետերը և կնպաստի ԵԱՀԿ Մինսկի խմբի հովանու ներքո ղարաբաղյան հակամարտության համապարփակ կարգավորմանը»,- ասել է Հունանյանը:
Նա հավելել է, որ Ռուսաստանի հետ Հայաստանի դաշնակցային հարաբերությունները հիմնված են երկու երկրների ժողովուրդների դարավոր բարեկամության վրա։ «Մեր համագործակցությունը պայմանավորված չէ այլ երկրների հետ հարաբերություններով, եթե մյուս կողմերը դրանք չեն զարգացնում ի վնաս Հայաստանի և Ռուսաստանի միության»,- պարզաբանել է նա։
