Արցախի Արայիկ Հարությունյանը Հայաստանում կոպեկներով գնած 200 հեկտար հողի վրա զինված մարդիկ է կարգել. ինքն էլ գալիս է ուղղաթիռով». Սերժ Սրապիոնյան
Ասում են ՝ պատմությունը կրկնվելու սովորություն ունի, ու դա է պատճառը, որ մինչև հիմա որևէ մեկը չի կարողացել պատասխանել հարցին, թե այդ ինչպե՞ս կարող էր գերմանացիների նման խելացի ժողովուրդը գնալ ինքնասպանական քայլի՝ առաջնորդ ընտրելով Հիտլերին։ Պատմությունը կրկնվեց հիմա, և որևէ մեկը չի կարող պատասխանել հարցին, թե ինչպե՞ս կարող է հայ ժողովրդին արհավիրք բերած իշխանությունը նորից իշխանություն ստանալ, ու այդ ինչպե՞ս ստացվեց, որ մեր ժողովուրդը մերժեց բոլոր արժեքները, որոնք կրում են նախկինները՝ չտեսնելով, որ այսօրվա ներկաների մեջ նախկիններն են ու նախկինների նախկինները։ 168 TV-ի «Ռեվյու» հաղորդաշարի եթերում այսպես բնորոշեց արտահերթ խորհրդարանական ընտրությունների արդյունքները ԵՊՀ հայ գրականության պատմության ամբիոնի դասախոս, գրականագետ Սերժ Սրապիոնյանը: Ընտրությունները Նիկոլ Փաշինյանին ու նրա քաղաքական թիմին կրկին կառավարություն ձևավորելու հնարավորություն տվեց: Միևնույն ժամանակ մեր զրուցակիցն ընդգծեց, որ իմիտացիա է, թե Արցախի 75 տոկոսի կորստի, 5000 զոհի պատճառ դարձած իշխանությանը կողմ է քվեարկել ժողովուրդը, իրականությունն այն է, որ նրանց կողմ է եղել քվեարկելու իրավունք ունեցողների ընդամենը 25 տոկոսը, հետևաբար, սա համապետական ընտրություն չէր, ու սխալ է ասել, թե սա ողջ ժողովրդի ընտրությունն է։
«Մյուս կողմից, այս արդյունքի պատճառն այն է, որ այն կինը, որը կարող է ասել, որ ես այնքան չեմ տխրել իմ որդու մահվան համար, որքան ուրախացել եմ քո հաղթանակի համար, վարչապետ ջան, այդ կնոջ համար՝ Արցախը տվել են, թե չեն տվել, բացարձակ որևէ նշանակություն չունի։ Այդ տեսակը մեր ժողովրդի մեջ, դժբախտաբար, որոշակի տոկոս կազմում է։ Ղարաբաղի տալն այն մարդկանց համար, որոնք այսօր կշտանալու խնդիր չունեն, որովհետև հազիվ կշտացել են, որևէ նշանակություն չուներ»,- ասաց Սրապիոնյանը։
Դիտարկմանը, եթե որոշակի տոկոս է կազմում, այդ դեպքում ինչպե՞ս է ստացվում, որ այդ մտածողությամբ մարդիկ իրենց կողմ քվեներով ապահովեցին Փաշինյանի իշխանության վերարտադրությունը, կարո՞ղ ենք արդյոք պնդել, որ այդ մտածողությունը դոմինանտ է, Սերժ Սրապիոնյանն արձագանքեց.
«Եթե մարդը, օրինակ, 5000 դրամը համեմատում է իր անհետ կորած թոռան հետ, եթե մարդը մտածում է, որ 5000 դրամով ավելացված թոշակով մի քանի հաց ավել կառնի, ես այս փաստարկի դեմ որևէ բան չեմ կարող ասել»:
Ըստ Սրապիոնյանի՝ հասարակության այդ հատվածը նաև զոհ է ինֆորմացիոն մեծ հարձակումներին, չփաստարկված հայտարարություններին՝ նախկինների թալանի մասին. զոհ է, քանի որ այդ հատվածը չունի վերլուծական կարողություններ։
Հարցին՝ փաստորեն այդ վերլուծական կարողություն ունեցող ու պետականության զգացողությունն իր մեջ կրող հատվածն էլ զո՞հ է այդ ամենը չունեցող հատվածին, Սրապիոնյանն պատասխանեց.
«Թվի խնդիրն է։ Խորհրդային դպրոցում մեզ ասում էին՝ միշտ քանակը տալիս է որակ։ Ես հիմա հասկանում եմ, որ դա մեխանիկորեն կրկնելը վտանգավոր միտք է, որովհետև քանակը ոչնչացնում է որակը։
Գրականագետի բնորոշմամբ՝ հիմա Հայաստանում ստեղծվել է մի իրավիճակ, որ երկրորդ կապիտուլյացիայի ստորագրմանը պատրաստվող իշխանությանը պետք է ուժեղ հակազդեցություն, իսկ դա կարող են անել այս ընտրությունների արդյունքներով խորհրդարան մտնող «Հայաստան» և «Պատիվ ունեմ» դաշինքները։
«Եթե ինքը պետք է գնա երկրորդ կապիտուլյացիայի ստորագրմանը, դա պետք է բերի հաստատի Ազգային ժողովում, բա այնտեղ խելքը գլխին մի քանի մարդ չլինի՞, որ փաստարկի, որ ժողովրդի թիկունքում տեղի է ունենում դավաճանություն կամ շարունակական դավաճանություն»,- ասաց Սրապիոնյանը՝ նշելով, որ իր համար ակնհայտ է, որ Փաշինյանը կգնա ավելի առաջ և Կառավարությունը ձևավորելուց հետո կստորագրի փաստաթուղթ, որտեղ ոչ միայն Արցախ չի լինի, այլ նաև Զանգեզուր, և այս ամենի մասին գիտեն Փաշինյանին սատարողները, այդ թվում՝ Արցախի մնացյալ մասի նախագահ Արայիկ Հարությունյանը, որին ինքը դավաճան է համարում։
«Հիմա Արայիկ Հարությունյանը, որ ազերիների ոտք չդրած և Նիկոլի ստորագրությամբ նրանց տրված տարածքներում իր հարստությունը կործանումից փրկեց, իմ գյուղին կպած 200 հեկտար հող է գնել՝ կոպեկներով։ Գնել է լավագույն հողերը և իմ գյուղացիներին զրկել է այնտեղ իրենց անասուններն արածեցնելուց։ Ուղղաթիռով է գալիս այդ հողերը տեսնելու, զինված մարդիկ է կարգել, որպեսզի գյուղացներն այնտեղ անասուն չտանեն։ Խոսքը Արմավիրի մարզի Զարթոնք գյուղի մասին է։ Դե հիմա թող բանական մարդիկ ինձ բացատեն՝ ինձ համար տարբերություն կա՞ Արայիկ Հարությունյանի դրած զինված մարդկանց և Շուռնուխում կանգնած ազերիների միջև, որոնք երկուսն էլ թույլ չեն տալիս գյուղացուն իր անասունն արածեցնել»,- ասաց Սերժ Սրապիոնյանը։
Հարցազրույցի մանրամասները՝ տեսանյութում
