Պուտինն Ալիևի հետ քննարկել է Լեռնային Ղարաբաղի շուրջ իրավիճակը
Ռուսաստանի նախագահ Վլադիմիր Պուտինը և Ադրբեջանի նախագահ Իլհամ Ալիևը հեռախոսազրույցի ընթացքում նշել են, որ Լեռնային Ղարաբաղում իրավիճակը հիմնականում կայուն է, հրադադարի ռեժիմը խստորեն պահպանվում է, հաղորդում է «ՌԻԱ Նովոստի»-ն`Կրեմլի մամուլի ծառայությանը հղումով:
«Ռուսաստանի Դաշնության նախագահ Վլադիմիր Պուտինը հեռախոսազրույց է ունեցել Ադրբեջանի Հանրապետության նախագահ Իլհամ Ալիևի հետ: Քննարկվել է իրավիճակը Լեռնային Ղարաբաղի շուրջ: Գոհունակությամբ նշվել է, որ իրավիճակը հիմնականում կայուն է, և հրադադարի ռեժիմը խստորեն պահպանվում է», – ասվում է հաղորդագրության մեջ:
Նաև, Ռուսաստանի և Ադրբեջանի նախագահները դրական են գնահատել Լեռնային Ղարաբաղի հարցով եռակողմ աշխատանքային խմբի գործունեությունը:
«Հաշվի առնելով Բաքվում Ռուսաստանի Դաշնության փոխվարչապետ (Ալեքսեյ) Օվերչուկի բանակցությունները, դիտարկվել է Հարավային Կովկասում տնտեսական կապերի և տրանսպորտային հաղորդակցության հաստատման աշխատանքների ընթացքը, որն անցկացվում է Ռուսաստանի, Ադրբեջանի և Հայաստանի ղեկավարների 2020 թվականի նոյեմբերի 9-ի և 2021 թվականի հունվարի 11-ի հայտարարություններին համապատասխան: Այս համատեքստում դրական գնահատական է տրվել երեք երկրի փոխվարչապետների համանախագահության ներքո գտնվող աշխատանքային խմբի գործունեությանը», – ասված է հայտարարության մեջ:
