Հիմա ադեկվատ ԱԺ ընտրություն ես չեմ պատկերացնում. Սուրեն Սահակյան
Ազգային ժողովի նախագահ Արարատ Միրզոյանը հանդիպել է «Քաղաքացու որոշում» սոցիալ-դեմոկրատական կուսակցության ներկայացուցիչներ Սուրեն Սահակյանի և Գարեգին Միսկարյանի հետ: Քննարկում է ծավալվել սահմանային անվտանգության, գերեվարված անձանց և ներքաղաքական իրավիճակի հանգուցալուծման հնարավոր ուղիների վերաբերյալ:
Արդյոք որպես ներքաղաքական իրավիճակի հանգուցալուծման հնարավոր ուղի ԱԺ նախագահ Արարատ Միրզոյանի հետ հանդիպման ընթացքում քննարկվե՞լ է երկրում արտահերթ խորհրդարանական ընտրություններ անելու հարցը՝ 168.am-ը փորձեց պարզել հանդիպման մասնակից Սուրեն Սահակյանից։
Վերջինս մեզ հետ զրույցում նշեց, որ, ի թիվս այլ հարցերի, խոսել են նաև արտահերթ խորհրդարանական ընտրությունների մասին։
«Որպես տարբերակ, այո՛, քննարկվել է։ Ժամկետներ չի մատնանշվել։ Եթե քննարկվում է քաղաքական համակարգի ճգնաժամի հաղթահարման հարցը, ապա նաև արտահերթ ընտրությունների հարցն է քննարկվում»,- ասաց Սահակյանը։
Հարցին՝ անձամբ կո՞ղմ է, որ այս փուլում երկրում անցկացվեն արտահերթ խորհրդարանական ընտրություններ, Սահակյանը պատասխանեց.
«Ես կողմ եմ արտահերթ ընտրություններին, բայց ոչ այս պահին։ Ընտրությունների համար պետք է համապատասխան պայմաններ լինեն։ Հիմա ադեկվատ ընտրություն ես չեմ պատկերացնում»,- ասաց Սահակյանը։
Հարցին՝ իսկ այդ մասին ասե՞լ է արդյոք Արարատ Միրզոյանին, և ի՞նչ պատասխան է ստացել նրանից, Սահակյանը պատասխանեց.
«Ես դիրքորոշում եմ հայտնել, եթե պատասխան էլ եղել է, հիմա չեմ մտաբերի, որովհետև գուցե էական չի եղել»։
