«Թող ընդդիմությունը հայտարարի՝ զենքի կիրառումը բացառում է, թե՞ չի բացառում». Փաշինյան
Առցանց ասուլիսի ընթացքում վարչապետ Նիկոլ Փաշինյանին հարց ուղղվեց անցած 2 տարիներին ընդդիմադիրներին թիրախավորելու ու դրա հնարավոր հետևանքների վերաբերյալ:
«Այս օրերին Ձեր մի շարք կողմնակիցներ թեզեր են շրջանառում, որ մեր իսկական թշնամին ներսում է, այսինքն՝ նրանք, որոնք Ձեզ քննադատում են կամ պահանջում են Ձեր հրաժարականը: Հայտնի հայտարարությունից ժամեր անց Դուք բոլոր այն քաղաքացիներին, ովքեր հասկանում են, թե ինչ է կատարվում, կոչ արեցիք պատրաստվել վրեժի: Անցած 2 տարում թիրախավորվել, հիմա էլ պարբերաբար թիրախավորվում են Ձեզ հետ, Ձեր որոշման հետ ոչ համամիտ մարդիկ, Ձեր հրաժարականը պահանջող մարդիկ: Դուք մտահոգություն չունե՞ք, որ նման կոչերը կարող են ավելի գրգռել հանրությանը, ավելի մեծ պառակտում մտցնել և բախումների հանգեցնել, ինչն անցանկալի հետևանքներով է հղի: Եվ արդյո՞ք Դուք այն կարծիքին եք, որ թշնամական երկրներով շրջապատրված Հայաստանում ճիշտ է ընդդիմախոսներին թիրախավորելն ու թշնամի ներկայացնելը»,- նշված էր «Փաստ» օրաթերթի հարցում:
Վարչապետի խոսնակը նոր էր ավարտել հարցի ընթերցումը, երբ վարչապետն անմիջապես զարմանք հայտնեց հարցում առկա ձևակերպումների առնչությամբ:
«Գիտեք, բայց ես ուզում եմ հասկանալ՝ երբ որ ասում են՝ «թիրախավորում են», ի՞նչ նկատի ունեն: Ո՞վ է ում թիրախավորում և ինչպե՞ս: Կարող ենք տասնյակ և հարյուրավոր օրինակներ ցույց տալ, երբ որ, ընդհակառակը, իշխանության ներկայացուցիչներն են թիրախավորվում: ԱԺ նախագահի հետ էն, ինչ որ տեղի ունեցավ… և, փառք Աստծո, Հայաստանում վերջին 2.5 տարվա ընթացքում ոչ մի ընդդիմադիրի հետ նման բան տեղի չի ունեցել, նույնիսկ մոտիկ բան տեղի չի ունեցել, և ես համոզված եմ՝ տեղի էլ չի ունենա:
Եվ, եթե մոնիտորինգ անեք՝ նույն սոցիալական ցանցերում, հլը էդ հարց ա՝ ով ա ավելի շատ թիրախավորվել վերջին 2.5 տարվա ընթացքում: Որովհետև զուտ ենթակառուցվածքների առումով իշխանությունը, կառավարությունը չունի էդքան ենթակառուցվածք թիրախավորելու, եթե նույնիսկ ցանկանա, եթե նույնիսկ ցանկանա, իսկ մենք էդպիսի ցանկություն չունենք:
Իսկ, որ մթնոլորտը երկրում պետք է լավացնել, որ ատելության խոսքը պետք է բացառել, այո, դա ակնհայտ փաստ է, դրա հետ ո՞վ կարող է վիճել: Բայց դրա համար պետք են կոնկրետ գործողություններ: Եվ ոչ միայն՝ իշխանության կողմից:
Ես Ձեզ կոնկրետ փաստ եմ բերում: Կառավարության ամսի 10-ի, 9-ի լույս 10-ի գիշերը, Ազգային ժողովի, Կառավարության, պաշտոնական կեցավայրի դեմ տեղի ունեցած հարձակումները, բռնությունները, գույքի ոչնչացումը քաղաքական ուժերը չեն դատապարտել: Համենայն դեպս, քաղաքական ուժերի մեծամասնությունը չի դատապարտել: Ինչո՞ւ: Սա տարօրինա՞կ հարց չի: Մի՞թե այն պատճառով, որ իրենք են կազմակերպել դա: Մի՞թե դա կարող է պատճառ լինել: Եվ, հետևաբար, ինչպե՞ս կարող են նրանք, ովքեր չեն դատապարտում էդ ամեն ինչը, կառավարությանը մեղադրել ատելության խոսք քարոզելու մեջ: Իսկ որտե՞ղ է ատելության խոսք քարոզվում, ո՞վ ա քարոզում էդ ատելության խոսքը:
Իմ երեկվա գրառո՞ւմն ա ատելության խոսքի արտահայտություն: Էդտեղ մի նախադասություն կա, որ, այո, գուցե այդ արտահայտության հեղինակը ես եմ, բայց մենք տեսանք, որ նույնիսկ ԲԴԽ նախագահը իր հայտարարության մեջ այդ հայտարարությունը օգտագործում ա: Ո՞վ ա ատելության խոսք քարոզում:
Պատկերացնո՞ւմ եք՝ բռնություններ ու ոչ մի դատապարտում: Հնարավոր ա՝ 1-2 քաղաքական ուժ էդ հարձակումները դատապարտած լինեն: Բայց, ընդհանուր առմամբ, չի դատապարտվել: Պետք ա դատապարտվի, որ էդ պրոցեսը կանգնի:
Եվ, հետևաբար, ընդդիմությունը պետք է հարցի, պատասխանի մի հարցի: Այդ գործիքակազմը, որը ինքը չի դատապարտել, շարունակո՞ւմ է մնալ, կամ իր համար ընդունելի՞ գործիքակազմ է, թե՞ չէ: Թող իրենք պատասխանեն էդ հարցին, որովհետև էդ հարցից շատ մեծ, էդ հարցի պատասխանից շատ մեծ բան է կախված, չափազանց մեծ բան:
Ես կարող եմ, որ կառավարության գործիքակազմի մեջ, ինչքան էլ փորձ արվի բառերը այլ կերպ մեկնաբանել, նման մտադրություն չկա և չի կարող լինել, որովհետև կառավարությունն ա իրավակարգի թիվ 1 պատասխանատուն՝ իր իրավապահ մարմիններով: Բայց ընդդիմությունը թող հստակ ասի, օրինակ, բռնությունը իր ծրագրերի մեջ մտնո՞ւմ է, թե՞ չի մտնում: Այ էստեղ ա հարցի պատասխանը: Եթե պարզվի, որ ընդդիմությունը բացառում է բռնության կիրառումը, ուրեմն մենք դրանով հարցը լուծված կհամարենք: Էդ դիսկուրսը ընդհանրապես դուրս կգա, կմնա սոցիալական ցանցերում լուծել փոխադարձ շփում, կուլտուրայի հարցը: Եվ էդ հարցը կարելի է լուծել՝ ա) օրենդրությամբ, բայց կարելի է լուծել նաև քաղաքական այդպիսի կոնտեքստ ձևավորելով և պայմանավորվածությամբ, որ այնուամենայնիվ միմյանց նկատմամբ հարգանքը և հարգալից խոսքը սկզբունքային նշանակություն ունի բոլորի համար, և մերժվելու է ատելության խոսքը կամ դրա հետ սահմանվող որևէ բան:
Էնպես որ, ես հարցում բարձրացված մտահոգությունը լրիվ կիսում եմ և առաջարկում եմ ճանապարհ այդ հարցը հենց հիմա լուծելու: Առաջինը, ընդդիմությունը հայտարարում է, որ… ես հայտարարում եմ, որ էն, ինչ այս գիշեր փորձեցին վերագրել մեզ, բացառված է, որ մեր գործողություններում լինի այդպիսի գործիքակազմ: Եթե էդպիսի մտադրություն լիներ, որևէ ձևով կարտահայտվեր: Ես հստակ ասում եմ՝ բացառված է, որ մեր մտադրություններում և գործողություններում լինեն այդպիսի քայլեր: Թող ընդդիմությունն ինքն էլ հայտարարի՝ ինքը բռնությունը բացառո՞ւմ է, թե՞ չի բացառում: Ինքը զենքի կիրառումը բացառո՞ւմ է, թե՞ չի բացառում: Եթե բացառում են, ուրեմն մենք… անհրաժեշտ նախապայմանները նաև երկխոսելու, նաև քննարկելու և համատեղ ուժերով իրադրությունը հաղթահարելու համար»,- ասաց Նիկոլ Փաշինյանը:
