Ավելի քան 1մլն դոլար պարգևավճար ՊԵԿ-ում․ ինչո՞ւ հրապարակման ենթակա չեն ՊԵԿ նախագահի և նրա տեղակալների պարգևավճարները
168․am-ը շարունակում է ուշադրության կենտրոնում պահել պարգևավճարների հարցը՝ առավելապես ռազմական դրության պայմաններում։ Ինչպես ավելի վաղ գրել էինք, պետական գերատեսչություններին պաշտոնական հարցում ենք ուղարկել՝ փորձելով ճշտել՝ արդյոք սեպտեմբեր-հոկտեմբեր ամիսներին տրվե՞լ են պարգևավճարներ։
Առաջինը ՀՀ Ազգային ժողովի աշխատակազմից տեղեկացանք, որ վերջին պարգևատրումը խորհրդարանում տրվել է ռազմական դրության հաստատումից ընդամենը մի քանի օր առաջ․ պարգևատրման չափը կազմել է աշխատավարձի 75%-ը։ Պատերազմի սկսվելուց հետո խորհրդարանում պարգևավճար չի տրվել։
Հաջորդ գերատեսչությունը ՀՀ Պետական եկամուտների կոմիտեն (ՊԵԿ) է։ Ինչպես տեղեկանում ենք պաշտոնապես մեզ տրված պատասխանից, ՀՀ պետական եկամուտների կոմիտեի աշխատակիցները 2020 թվականի նշված ժամանակահատվածում (սեպտեմբեր և հոկտեմբեր ամիսներ) պարգևատրվել են մեկ անգամ` սեպտեմբեր ամսվա համար, որը կազմել է 496,198.0 հազար դրամ (ավելի քան 1 միլիոն դոլար):
Պարգևատրումն իրականացվել է աշխատակցի անմիջական ղեկավարի կողմից տրված գնահատականի հիման վրա:
ՊԵԿ-ից փորձել էինք ճշտել՝ հատկապես որքա՞ն պարգևավճար են ստացել ՊԵԿ նախագահը և նրա տեղակալները։
Հարցին ի պատասխան՝ նշել են․
«Ինչ վերաբերում է Կոմիտեի նախագահին և նրա տեղակալներին տրված պարգևավճարներին, ապա հայտնում ենք, որ այդ տվյալները անձնավորված են և չեն կարող տրամադրվել: Միաժամանակ, հաշվի առնելով, որ «Հանրային ծառայության մասին» ՀՀ օրենքի 34-րդ հոդվածով սահմանված գույքի, եկամուտների, շահերի և փոխկապակցված անձանց մասին հայտարարագրման պարտականություն ունեցող պաշտոնատար անձինք նույն օրենքի համաձայն ներկայացնում են հայտարարագրեր, հետևաբար՝ վերջիններիս կողմից հայտարարագրած եկամուտները տեսանելի և հասանելի կլինեն հանրությանը»։
Նկատենք, որ պետական մի շարք գերատեսչությունների պաշտոնական հարցումներ ուղարկելուց օրեր անց վարչապետի աշխատակազմից հայտնեցին, որ պետական համակարգում պարգևավճարներ չնախատեսելու հանձնարարական է տրվել։
