Նավթի ոլորտում ԵԱՏՄ օրենսդրության ներդաշնակեցման «ճանապարհային քարտեզը» կընդունվի մինչև 2020թ. վերջը
Եվրասիական տնտեսական հանձնաժողովի կոլեգիային առընթեր նավթի և գազի հարցերով խորհրդատվական կոմիտեի անդամները քննարկել են նավթային ոլորտում Եվրասիական տնտեսական միության պետությունների օրենսդրության ներդաշնակեցման «Ճանապարհային քարտեզը»: Այս մասին հայտնում են ԵՏՀ մամուլի ծառայությունից:
Կողմերը հավանություն են տվել փաստաթղթի նախագծին և համաձայնեցված որոշում կայացրել ԵՏՀ խորհրդում և Եվրասիական բարձրագույն տնտեսական խորհրդում դրա հետագա քննարկման մասին: Նախատեսվում է, որ փաստաթուղթը կհաստատվի մինչև 2020 թվականի վերջը:
«Ճանապարհային քարտեզի» նախապատրաստումը նախատեսված է միության նավթի և նավթամթերքների ընդհանուր շուկաների ձևավորման ծրագրով: Ենթադրվում է, որ օրենսդրության ներդաշնակեցման անցկացումը կներառի նաև ընդհանուր շուկաների մասնակիցների միջև նավթի և նավթամթերքների առևտրի շուկայական մեխանիզմների ապահովումը և ընդհանուր շուկաների շրջանակներում նավթի և նավթամթերքների փոխադրման ծառայությունների նկատմամբ սակագների ձևավորման ընդհանուր սկզբունքների և մեթոդների կիրառումը:
Նիստի մասնակիցները քննարկել են նաև ԵԱՏՄ նավթի և նավթամթերքների ընդհանուր շուկաների ձևավորման մասին համաձայնագրի նախագծի վրա տարվող աշխատանքների ընթացքը և միության գազի ընդհանուր շուկայի ձևավորման առաջին փուլի միջոցառումների կատարումը:
Նիստի ընթացքում քննարկվել են միության պետությունների տարածքներում տեղակայված գազատրանսպորտային համակարգերին հասանելիության միասնական կանոնների և բորսայական առևտրի իրականացման կարգի նախապատրաստման հարցերը և այլ թեմաներ:
Ինչպես ընդգծել է ԵՏՀ էներգետիկայի և ենթակառուցվածքի նախարար Էմիլ Կայկիևը, ընդհանուր նավթագազային շուկաների ձևավորումը միության զարգացման ռազմավարական ուղղություններից մեկն է: Հանձնաժողովը անդամ պետությունների հետ համատեղ ինտենսիվ աշխատանք է տանում ընդհանուր շուկաների ձևավորման միջոցառումների ծրագրերի իրականացման ուղղությամբ։
Նավթի և գազի հարցերով Խորհրդատվական կոմիտեի կազմում ընդգրկված են ԵԱՏՄ բոլոր երկրների պետական իշխանության մարմինների և պետական կազմակերպությունների ներկայացուցիչները: Կոմիտեի նախագահը ԵՏՀ էներգետիկայի և ենթակառուցվածքի հարցերով նախարարն է:
Կոմիտեի հիմնական խնդիրներն են նավթագազային ոլորտում համագործակցության հարցերով պետական իշխանության մարմինների և պետական կազմակերպությունների ներկայացուցիչների հետ խորհրդակցությունների անցկացումը, առաջարկությունների պատրաստումը, միության շրջանակներում միջազգային պայմանագրերի և նավթագազային ոլորտում միության մարմինների ակտերի կատարելագործմանը մասնակցությունը և այլն:
