«2 տարվա մեջ առաջին անգամ մենք կանխել ենք Ադրբեջանի ցանկությունը՝ բարելավել իր դիրքը»․ Ռոբերտ Քոչարյան
ՀՀ երկրորդ նախագահ Ռոբերտ Քոչարյանը երեք հեռուստաընկերությունների լրագրողներին տված իր հարցազրույցում անդրադառնալով հայ-ադրբեջանական սահմանին Ադրբեջանի հրահրած ռազմական գործողություններին՝ ասաց, որ Ադրբեջանը փորձել է բարելավել իր դիրքերը և հայկական զինված ուժերը ոչ միայն կանխել են, այլև արժանի հակահարված տալով՝ բարելավել են իրենց դիրքերը։
«Սա է կատարվել սահմանի հատվածում։ Համարում եմ, որ մեր զինված ուժերը արձագանքել են ճիշտ ժամանակին, արագ և համաչափ։ Դրանից հետո փորձելով վերադարձնել նախկին իրավիճակը՝ Ադրբեջանը սկսել է ռմբակոծել հայկական գյուղերը՝ օգտագործելով հրետանի, ԱԹՍ-ներ։ Այդ լոկալ մարտը վերածվեց ավելի մասշտաբային մարտական գործողությունների»,-ասաց երկրորդ նախագահը։
Նրա խոսքով՝ այս ամենը պետք է դիտարկել անցած երկու տարվա կտրվածքով․ «Ըստ էության, առաջին անգամ մենք կանխել ենք Ադրբեջանի ցանկությունը՝ բարելավել իր դիրքը, իսկ դիրքային առավելությունը շատ կարևոր է։
Զինվորականները պետք է համարեն, որ այս կոնֆլիկտը լուծում չունի, տևելու է շատ երկար, և եթե քո մարտական դիրքը հարմար է, ապա դու երկար տարիներ ունենում ես շատ քիչ գլխացավանք, և հակառակը՝ մյուս կողմի համար։ Դրա համար չափազանց կարևոր է առաջնագծում միշտ մտածել դիրքերը բարելավելու և ամրապնդելու մասին, ինչը ցավոք մենք չէինք անում վերջին երկու տարվա ընթացքում՝ իրենք բարելավում էին իրենց մարտական դիրքերը և ամրացնում եղած դիրքերը։ Եվ հավանաբար սովորել են, որ այդպես էլ պետք է լինի։ Եվ երբ կանխվեց և հակառակը տեղի ունեցավ, այս ձևով՝ խաղաղ բնակչությանը գնդակոծելով՝ փորձում էին ճնշում գործադրել Հայաստանի վրա՝ մեկ պարզ պատճառով՝ վերադարձնել այն, ինչի համար այս ամենը սկսել են»։
