«Երբ կորոնավիրուսը վերջանա՝ ուրիշ հարված կգա բնության կողմից»․ Կարինե Դանիելյան

Այս անձրևային եղանակն աջակցում է մեր ջրային ռեսուրսների վերականգնման գործընթացին, նպաստում է կանաչ տարածքների նորմալ աճին։ Երևանը և մի քանի տարածքներ կիսաանապատային գոտիներ են, և մեզ համար անձրևն ուղղակի անհրաժեշտություն է, և այդ առումով ես ողջունում եմ այս անձրևոտ գարունը»,- 168․am-ի հետ զրույցում ասաց բնապահպան Կարինե Դանիելյանը։

Նա ընդգծեց՝ իրավիճակը, իսկապես, շատ բարենպաստ է և՛ էկոլոգիայի, և՛ գյուղատնտեսության համար. «Միշտ ոռոգման խնդիր ենք ունեցել, միշտ ասում են, որ ջուրը չի բավարարում՝ չնայած Սևանից ջուր էր բաց թողնվում։ Շատ կարևոր է նաև, որ մենք Սևանից լրացուցիչ ջուր բաց չթողնենք, որովհետև Սևանի վիճակը լավ չէ։ Այն, որ մենք վերջին 2 տարին մասշտաբային ծաղկումներ ունեցանք, դա շատ վատ ցուցանիշ է, ճահճացման ցուցանիշ է, ես շատ անհանգստությամբ եմ սպասում, թե ամռանն ինչ կլինի Սևանի հետ։ Անկախ ամեն ինչից՝ պետք է գումարներ գտնենք, որ Սևանի ավազանում լիարժեք մաքրման կայաններ լինեն, որ այլևս լիճն այդքան աղտոտված նյութեր չընդունի։ Հույս ունեմ, որ այս անձրևներից բավարար քանակությամբ ջուր կկուտակվի ջրամբարներում  և ճիշտ կօգտագործվի, և մենք կարիք չենք ունենա Սևանից լրացուցիչ ջուր վերցնել»։

Բնապահպանը մտահոգություն ունի, որ կորոնավիրուսի հետ կապված՝ տնտեսական ճգնաժամ կծավալվի, որը կհարվածի նաև բնությանը․

«Եթե մարդիկ ի վիճակի չլինեն գազի կամ էլեկտրաէներգիայի համար վճարել, վառելիքի խնդիր լուծել, ստիպված պետք է գնան՝ սկսեն ծառեր ոչնչացնել։ Եթե սննդի հնարավորություն չունեն, պետք է գնան անտառ՝ ծառերը կտրեն, վաճառեն, որ գումար ունենան։ Այդ վիճակում մարդն արդեն մոռանում է էկոլոգիական մոտեցումների մասին։ Ես հույս ունեմ, որ կկարողանանք այս վիճակից արժանապատիվ դուրս գալ»։

Կարինե Դանիելյանն ասաց, որ մտավորականների խորհրդով քննարկել են և ուզում են, որ Հայաստանը հանդես գա հետևյալ առաջարկությամբ․

«Պետք է դիմել ՄԱԿ-ի Անվտանգության խորհրդին, որովհետև մեզ՝ էկոլոգներիս համար, այս վիրուսը պատահականություն չէ, օրինաչափություն է, և երբ վիրուսը վերջանա, ուրիշ հարված կգա բնության կողմից։ Բնությունն այլևս չի հանդուրժում մարդկության այս հակաէկոլոգիական գործունեությունը։ Եվ այս առումով՝ պետք է ակտ մշակել հենց մարդկության գործունեության, մտածելակերպի խիստ էկոլոգիացման ուղղությամբ, և դա միայն կարող է անել ՄԱԿ-ի Անվտանգության խորհուրդը, որովհետև իր որոշումները պարտադիր են։

Ես շատ կուզենամ, որ հենց Հայաստանն այդ առաջարկով հանդես գա։ Եթե մենք կարողացել ենք ժամանակին առաջինը գնահատել և ընդունել քրիստոնեությունը, ապա կարծում եմ՝ հիմա պարտավոր ենք նաև հանդես գալ մարդկության մտածողության գլոբալ, ռադիկալ փոփոխության առաջարկով»։