Մարդու իրավունքների պաշտպանը Ռոբերտ Քոչարյանին մեկուսարան տեղափոխելու հարցով գրություն է ուղարկել ՔԿԾ պետին
Մարդու իրավունքների պաշտպանի աշխատակազմը ՀՀ երկրորդ նախագահ, Մարտի 1-ի գործով մեղադրյալ Ռոբերտ Քոչարյանին բուժհաստատությունից «Երևան-Կենտրոն» ՔԿՀ տեղափոխելու հարցի վերաբերյալ գրություն է ուղարկել Քրեակատարողական ծառայության ղեկավարին:
168.am-ին ՄԻՊ հանրային կապերի բաժնի պետ Նունե Հովսեփյանը փոխանցեց, որ գրության հիմքում դրված է Ռոբերտ Քոչարյանի փաստաբանների բողոքը:
Ն. Հովսեփյանը նաև տեղեկացրեց, որ ՄԻՊ աշխատակազմը կապ է հաստատել Քրեակատարողական ծառայության հետ և ճշտել, որ Ռոբերտ Քոչարյանի «Էրեբունի» ԲԿ-ից «Երևան-Կենտրոն» ՔԿՀ տեղափոխման հիմքում եղել է բժշկական համապատասխան ցուցումը, բայց քանի որ առկա է գրավոր դիմում, ՔԿԾ պետին գրություն է հասցեագրվել:
Հիշեցնենք, որ Ռոբերտ Քոչարյանը «Էրեբունի» բժշկական կենտրոնում ստացիոնար բուժում ստանալուց հետո երեկ առավոտյան էր տեղափոխվել «Երևան-Կենտրոն» քրեակատարողական հիմնարկ։
Քոչարյանի պաշտպանները, պայմանավորված ՔԿ համակարգում առկա կորոնավիրուսային վարակի հաստատված դեպքերով, ահազանգել էին, որ Ռոբերտ Քոչարյանի առողջական վիճակը թույլ չի տալիս, որ նա պահվի ՔԿՀ-ում, որի աշխատակիցները դեռ չեն հանձնել կորոնավիրուսի թեստը։
Հիշեցնենք նաև, որ Ռոբերտ Քոչարյանը «Նաիրի» ԲԿ-ից «Էրեբունի» ԲԿ տեղափոխվել էր մարտի 8-ին:
