«Ինձ թվում է՝ հայերեն է, բոլորը հասկանում են՝ ինչ է նշանակում: Չեմ կարող թարգմանել Ձեզ համար հայերենից հայերեն». ԲԴԽ անդամ Հայկ Հովհաննիսյան
Երեկ՝ փետրվարի 27-ին, Բարձրագույն դատական խորհուրդը (ԲԴԽ) նիստ է գումարել՝ դատավոր Արայիկ Մելքումյանի լիազորությունների դադարեցման հետ կապված Սահմանադրական դատարանի (ՍԴ) որոշման հետ կապված:
ՍԴ որոշման հետ կապված՝ ԲԴԽ անդամներից Հայկ Հովհաննիսյանը ծավալուն հատուկ կարծիք էր գրել, որում մասնավորապես իրեն թույլ էր տվել կատարել արտահայտություններ, որոնք հարիր չեն ապաքաղաքական մարմնի ներկայացուցչին:
Ուշագրավ է այն հանգամանքը, որ հենց երեկ 168.am-ի եթերում ԲԴԽ մեկ այլ անդամ՝ Գրիգոր Բեքմեզյանը, նշել էր՝ «Ես՝ որպես ԲԴԽ անդամ, սկզբունք եմ որդեգրել, և Խորհուրդն էլ այդ սկզբունքը որդեգրել է, որ մենք ՍԴ-ի հետ կապված որևէ կարծիք չենք հայտնում և վերաբերմունք չենք դրսևորելու, որովհետև մենք առանձին սահմանադրական մարմիններ ենք և չենք ուզում այդ վեճի մեջ խառնվել»:
Գրիգոր Բեքմեզյանի հետ զրույցում այսօր նկատեցինք, որ կարծես թե ԲԴԽ անդամներից ոչ բոլորն են կիսում Խորհրդի դիրքորոշումը, ինչին վերջինս պատասխանեց, որ անդամն իրավունք ունի մյուս անդամներից տարբերվող կարծիք ունենալու և դա արտահայտելու:
Հարցին, թե արդյո՞ք ԲԴԽ անդամը քաղաքական հրապարակային չեզոքություն պարտավոր չի պահպանել կամ Սահմանադրական այլ մարմնի վերաբերյալ խոսելիս կողմ չլինել, Գրիգոր Բեքմեզյանը պատասխանեց, որ որպես ընդհանուր պահանջ՝ ԲԴԽ անդամը պարտավոր է քաղաքական չեզոքություն պահպանել (սա Դատական օրենսգրքի պահանջ է):
«ՍԴ-ի մասով ես և ԲԴԽ մեծամասնությունը, ինչպես նկատում եք, պահպանում է իմ ասած չեզոքությունը: ՍԴ մասով ԲԴԽ առանձին անդամների գործողությունները, կարծում եմ, ճիշտ կլինի՝ իրենք մեկնաբանեն»,- ասաց ԲԴԽ անդամը՝ հավելելով, որ ինքը չի ասում՝ Հայկ Հովհաննիսյանի կողմից արվել են քաղաքական հայտարարություններ. ինքն ընդհանուր է ասում Օրենսգրքի պահանջը:
168.am-ը կապ հաստատեց խնդրահարույց արտահայտությունների հեղինակի՝ Հայկ Հովհաննիսյանի հետ: Վերջինս նախ ուղղեց մեզ, որ ինքը որևէ հայտարարություն չի արել, այլ գրել է հատուկ կարծիք:
– Ձեր գրած հատուկ կարծիքի մեջ արել եք արտահայտություններ, որոնք քաղաքական են ըստ էության…
– Դուք այդպե՞ս եք գնահատում:
-Ես ուզում եմ, որ Դուք գնահատեք: ԲԴԽ-ն ու ՍԴ-ն երկու տարբեր սահմանադրական մարմիններ են, ճի՞շտ է:
– Այո:
– Երբ մի սահմանադրական մարմնի ներկայացուցիչը արտահայտություններ է անում, որոնցում հստակ դիրքորոշում է հայտնում մեկ այլ սահմանադրական մարմնի վերաբերյալ, և ըստ էության նաև «Այո»-ի կոչ եք արել…
– Ոչ, ես այդպիսի կոչ չեմ արել, Դուք երևի սխալ եք կարդացել: Երկրորդը, այն բանի վերաբերյալ, որ սահմանադրական մարմինը արտահայտություններ է թույլ տալիս, Դուք վստահաբար նկատի ունեք ՍԴ այն արտահայտությունները, որ ուղղված էին մյուս սահմանադրական մարմնին՝ Վճռաբեկ դատարանի՞ն, որտեղ ասվում էր, որ Վճռաբեկ դատարանը կամայականություն է թույլ տալիս և իրավունքների վերազանցո՞ւմ:
– Ոչ, ես դա նկատի չունեմ: Ես…
– Իսկ դա ինչո՞ւ նկատի չունեք:
– Իսկ կլինի՞ մենք որոշենք՝ ինչ նկատի ունենանք:
– Բայց դա էլ է հետաքրքիր: Ես քանի որ գիտեմ, որ Դուք կոնկրետ նպատակով եք զանգել, ես ուզում եմ, որ Ձեր զանգը լինի չեզոք և մասնագետի, ոչ թե «Ոչ»-ի կամ «Այո»,-ի…Ես թե «Ոչ»-ից, և թե «Այո»-ից դուրս եմ:
– Ես կոնկրետ զանգել եմ՝ Ձեր հատուկ կարծիքի հետ կապված:
– Ինձ այդպես չի թվում:
– Դուք սվիններով եք ընդունում իմ հարցերը կարծես թե:
– Սվիններով չեմ ընդունում: Ուղղակի ես սովոր եմ, ես գիտեմ, որ լրագրողները լինում են օբյեկտիվ և լինում են պրոֆեսիոնալ: Ես սովոր եմ աշխատել այդպիսի լրագրողների հետ և ի սկզբանե Ձեզ այդպիսին եմ դիտում:
– Ես պարզապես կարդամ Ձեր արտահայտությունները, Դուք մեկնաբանեք դրանք:
– Ես չէի ուզենա, որ իմ արտահայտությունները լինեն ենթատեքստից պոկած:
– Ես կարդամ, Դուք որոշեք՝ պոկա՞ծ են ենթատեքստից, թե՞ չէ: «Հայրենիքի համար այսպիսի վճռորոշ պահերին պետք չէ մնալ որպես «բերան, որն օրենքի բառեր է արտասանում լոկ»։ Ի՞նչ է սա նշանակում:
– Այո:
– Կամ՝ «Անհրաժեշտ է քայլ անել` ապահովելու համար մեր քաղաքացիների ազատ կամարտահայտման սուրբ իրավունքը և հարգել դրա արդյունքները, ինչպիսին էլ որ դրանք լինեն»:
Կամ ի՞նչ է նշանակում՝ «Կարծիքս մինչև վերջ կարդացող սակավաթիվ համբերատարներից ես նախալսում եմ քաղաքական զսպվածությունը և չեզոքությունը խախտելու մեղադրանքների գվվոցը»։
– Ինձ թվում է՝ հայերեն է, բոլորը հասկանում են՝ ինչ է նշանակում: Չեմ կարող թարգմանել Ձեզ համար հայերենից հայերեն:
– Այսինքն՝ Դուք գտնում եք, որ ԲԴԽ անդամի համար սա նորմալ բառամթե՞րք է:
– Այն ամեն ինչը, ինչ որ ես ասացի, գրված է իմ հատուկ կարծիքում, իմ կողմից ստորագրված է: Եթե ես ինչ-որ բան աննորմալ գտնեի, չէի ստորագրի դրա տակ և չէի գրի այդ ամեն ինչը:
