Կրակոցներ Միչիգանում. հինգ մարդ է զոհվել, այդ թվում՝ հրաձիգը
ԱՄՆ-ի Միչիգան նահանգի հյուսիսային գյուղական շրջանում հինգ մարդ հայտնաբերվել է մահացած, հայտնում է NBC News-ը։
Ենթադրյալ հրաձիգը նույնպես հայտնաբերվել է մահացած։
Ոստիկանները ժամանել են Միսաուկի շրջանի Լեյք թաունշիփի տարածք այն բանից հետո, երբ ուրբաթ ուշ առավոտյան հաղորդում էր ստացվել հրաձգության մասին։ Տներից մեկում իրավապահները հայտնաբերել են երեք մարդու մարմիններ։ Եվս մեկ մարդ ստացել է ծանր վնասվածքներ և հոսպիտալացվել։
Ոստիկանությունը կասկածյալ է անվանել 39-ամյա Չադ Հիկմանին և հայտնել, որ հրաձգությունից հետո նա փախել է դեպքի վայրից։
Որոնողական գործողության ընթացքում ոստիկանները Միսաուկի շրջանում մեկ այլ տանը հայտնաբերել են ևս մեկ զոհվածի։ Այնուհետև կասկածյալի ավտոմեքենան հայտնաբերվել է Քոլդուել թաունշիփում գտնվող Ուիթլոք լճի մոտ՝ անտառային զանգվածից ոչ հեռու։
Ավելի ուշ մոտակայքում գտնվող անտառում իրավապահները հայտնաբերել են Հիկմանի և ևս մեկ մարդու մարմինները։
Այսպիսով, միջադեպի հետևանքով զոհվածների ընդհանուր թիվը հասել է հինգի՝ ներառյալ ենթադրյալ հրաձիգը։
«Այս իրավիճակը իսկական ողբերգություն է դարձել տեղական համայնքի համար և լուրջ փորձություն՝ քննությամբ զբաղվող աշխատակիցների համար», – հայտարարել է նահանգային ոստիկանության լեյտենանտ Էշլի Միլլերը։
Հանցագործության դրդապատճառը դեռ պարզվում է։ Զոհվածների ինքնությունները չեն բացահայտվում։
