«Ռոմա»-«Գենտ». «գայլերը»՝ ընդդեմ «գոմեշների»
Եվրոպայի լիգայում սկսվում են փլեյ-օֆֆի խաղերը։ «Ռոման» սեփական հարկի տակ կընդունի «Գենտին»։
«Ռոմա»
«Ռոման» Իտալիայում ամենաանկանխատեսելի թիմերից մեկն է և Սերիա Ա-ում կայացած հզոր մեկնարկից հետո անսպասելիորեն անցկացնում է չորս հանդիպում, որոնցում ստանում է ընդամենը մեկ միավոր, ինչը քչերը կարող էին կանխատեսել: Մինչ օրս «գայլերը» վաստակել են 39 միավոր և զբաղեցնում են հինգերորդ հորիզոնականը, իսկ վերջին խաղում նրանք պարտվեցին «Ատալանտային» (1:2):
Իտալիայի գավաթի քառորդ եզրափակիչ խաղում մայրաքաղաքային թիմը պարտվեց «Յուվենթուսին» (1:3):
Սերիա Ա-ում «Ռոմայի» գործերը վերջերս այնքան էլ լավ չեն։ Ֆոնսեկան աշխատանքը պահելու համար պետք է համոզիչ հաղթանակ տանի «Գենտի» հետ առաջին խաղում․ միավորների հերթական կորուստը պորտուգալացի մարզչին չի ներվի։
Այսօրվա հանդիպմանը մասնակցել չեն կարողանա Ձանիոլոն, Զապակոստան, Դիավարան և Միրանտեն։
«Գենտ»
Բելգիայի հինգերորդ թիմը վերջին անգամ պարտվել է դեկտեմբերի 12-ին և այդ ժամանակից ի վեր չի պարտվել ոչ մի խաղում։ Մինչ օրս «Գենտը» ունի 15 հաղթանակ և 7 ոչ-ոքի։ Թիմը արդեն խփել է 54 գոլ, որոնցից 15-ը գրանցված է Դեյվիդի անվան դիմաց․ նա լիգայի լավագույն ռմբարկուն է։ «Գոմեշները» ունեն 52 միավոր, ինչը 9 միավորով պակաս է առաջատար «Բրյուգեից»:
Խաղին չեն մասնակցելու Դեպուատրը և Յերեմչուկը։
Մասնագետները վստահ են, որ այս խաղում հաղթանակը լինելու է «Ռոմայինը»։ Սակայն, դժվար թե, հաղթանակը «գայլերին» հեշտ տրվի՝ հաշվի առնելով վերջին հանդիպումները։
Խաղը տեղի կունենա այսօր՝ կեսգիշերին։
Սիրարփի Աղաբաբյան
