Պոգբան և Դիբալան երազում են միասին խաղալ․ «Յուվեն» գործում է

«Յուվենթուսը» կարող է ավելի ակտիվանալ «Մանչեսթեր Յունայթեդի» կիսապաշտպան Պոլ Պոգբայի տեղափոխության շուրջ բանակցություններում, հայտնում է Tuttosport-ը:

Աղբյուրի համաձայն՝ 26-ամյա կիսապաշտպանի վերադարձն իտալական ակումբ պայմանավորված է հարձակվող Պաուլո Դիբալայի հետ պայմանագրի հնարավոր երկարաձգմամբ:

Արգենտինացին և ֆրանսիացին մտերիմ ընկերներ են և երազում են միասին խաղալ:

Բացի աշխատավարձից և այլ պայմաններից, Դիբալայի համար կարևոր են թիմի գործընկերները: «Յուվեում» Պոգբայի ներկայության գործոնը կօգնի լուծել Դիբալայի հետ աշխատավարձի վերաբերյալ խնդիրները։

Ավելի վաղ հաղորդվում էր, որ «Յուվենթուսը» բանակցություններ է վարում Դիբալայի հետ պայմանագիրը երկարաձգելու մասին։ Կողմերը ցանկանում են երկարաձգել պայմանագիրը մինչև 2025 թվականը: Հայտնի է դարձել նաև, որ հարձակվողը ցանկանում է թուրինյան ակումբում տարեկան 10 միլիոն եվրո ստանալ:

Ա Սերիայի ընթացիկ մրցաշրջանում Դիբալան «Յուվեի» կազմում անցկացրել է 21 հանդիպում, խփել է 5 գոլ և տվել է 7 գոլային փոխանցում:

Սիրարփի Աղաբաբյան