«Մարիամ Փաշինյանն ասելիք ունի, նրա գրառումները խորքային են». Հովիկ Աղազարյան

ԱԺ «Իմ քայլը» խմբակցության պատգամավոր Հովիկ Աղազարյանը 168TV-ի «Ռեվյու» հաղորդման ժամանակ ասաց, որ խմբակցության ներսում Արթուր Վանեցյանի վերաբերյալ քննարկումներ չեն ունեցել. «Եթե տարբեր առիթներով հանդիպում ենք և ընդհանուր բնույթի զրույցներ ենք ունենում, երևի հազվադեպ անդրադառնում ենք այդ խնդրին, այդպիսի բան չկա: Վանեցյանի հետ կապված ՔՊ-ից արտահոսքը բացառված է»:

Հիշեցնենք, որ այս օրերին խոսակցություններ էին շրջանառվում, որ իշխանական կուսակցության վարչությունը քննարկում է ԱԱԾ նախկին տնօրեն Արթուր Վանեցյանին պետական հեղաշրջման փորձի համար կալանավորելու հարցը, ինչպես նաև խոսում են այն մասին, որ մեծ արտահոսք է սպասվում ՔՊ-ից:

Նիկոլ Փաշինյանի ընտանիքին պատկանող կայքը հոդված էր հրապարակել Արթուր Վանեցյանի դեմ՝ գրելով, թե նա է եղել Նիկոլ Փաշինյանի ընտանիքի անդամների դեմ կայքերում հրապարակվող նյութերի հեղինակը:

Պատգամավորից հետաքրքրվեցինք՝ հավատո՞ւմ եք, որ Արթուր Վանեցյանը նման բան կարող էր անել:

Ի պատասխան՝ Հովիկ Աղազարյանն ասաց, որ Արթուր Վանեցյանին նախկինում ընդհանրապես չի ճանաչել, իսկ հեղափոխությունից հետո ճանաչել է՝ որպես բարձրաստիճան պաշտոնյա.

«Մեկ-երկու անգամ իր հետ հանդիպելու առիթ եմ ունեցել, և հետևաբար՝ պատասխանել այդ հարցին շատ դժվար է: Միակ թեթև բռնելու տեղը, որ կարելի է փորձել պատասխանել այդ հարցին, կարող է լինել այն, որ Արթուր Վանեցյանն իր պաշտոնը թողնելուց հետո հայտարարեց, որ ինքը դեռ կխոսի, դեռ ասելիք ունի: Բայց դրանից էլ հետևություն անել, որ նա կարող է նման բան անել, ես չեմ կարող: Ես ո՛չ կժխտեմ, ո՛չ կհաստատեմ»:

Հարցին՝ Արթուր Վանեցյանը Նիկոլ Փաշինյանի իշխանության համար երբևէ վտանգ ներկայացրե՞լ է կամ այսօր ներկայացնո՞ւմ է, նա այսպես պատասխանեց. «Դե, եթե շարունակեր պաշտոնավարել ԱԱԾ պետի պաշտոնում և եթե հետապնդեր քաղաքական նպատակներ, ապա դա անթույլատրելի էր և ինչ-որ վտանգներ կներկայացներ: Հիմա արդեն՝ ոչ»:

Հովիկ Աղազարյանից ճշտեցինք, թե ինչպե՞ս է վերաբերվում վարչապետի ընտանիքի անդամների ներգրավմանը քաղաքական գործընթացներին:

«Վարչապետի ընտանիքի անդամներից մեկը ծառայում է բանակում, որը նույնպես բավականին ակտիվ երիտասարդ էր և շատ ակտիվ մասնակցություն ուներ մեր կազմակերպած շատ-շատ միջոցառումների: Մյուսը տիկին Աննա Հակոբյանն է, որն ինքն իրենով կայացած անձնավորություն է՝ իր աշխարհայացքով և անցած ուղիով, և շատ տարօրինակ կլիներ, որ հակառակը լիներ իր դեպքում: Մարիամն էլ, եթե չեմ սխալվում, 20 տարեկան է. 20 տարեկան երիտասարդ օրիորդ, ով նույնպես ասելիք ունի: Հետևաբար՝ այստեղ ոչ մի տարօրինակ բան չկա: Այն ձևակերպումը, որ ընտանիքը խառնվում է գործերին, այս դեպքում համապատասխան չէ»,- պարզաբանեց պատգամավորը:

Հովիկ Աղազարյանը նկատեց՝ Մարիամ Փաշինյանի գրառումներն ուշադրության են արժանանում, որովհետև նա վարչապետի դուստրն է. «Բայց շատ-շատ երիտասարդներ կան, որոնք նույնպես նմանատիպ գրառումներ են անում: Միգուցե ոչ միշտ՝ ճիշտ, բայց նրանք իրավունք ունեն, չէ՞»:

Հարցին՝ եթե նման ակտիվություն դրսևորեին նախկին իշխանության ընտանիքի անդամները, իր վերաբերմունքը նույնը կլինե՞ր, պատգամավորը պատասխանեց.

«Նման ակտիվություն չէին կարող դրսևորել նախկին պաշտոնյաների ընտանիքի անդամները, որովհետև նախկին պաշտոնյաները եկել են այդ դիրքին լրիվ ուրիշ մեթոդներով, ձևերով, հետևաբար՝ չի եղել գործընթաց, որ այդ գործընթացի մեջ ընտանիքի անդամներն այս կամ այն կերպ ներգրավված լինեին, կարծիք հայտնեին և որպես անհատներ ձևավորվեին: Ո՞վ կարող էր մտածել, որ վաղը չէ մյուս օրը պետք է կազմակերպվեն ընտրություններ, և այդ ընտրությունների կեղծելու արդյունքում իր հայրիկը պետք է զբաղեցնի ՀՀ նախագահի պաշտոնը, ո՞վ կարող էր նման բան մտածել: Հետևաբար, ինքը ո՞նց պետք է պատրաստ լիներ: Դրա համար հիմա փորձում են՝ որոշ դեպքերում խոսք են ասում, ելույթներ են ունենում՝ ստեղծված իրավիճակի թելադրանքին համապատասխան, և տեսնում ես, որ շատ խորքային չեն»:

Ճշտեցինք՝ այսինքն՝ Մարիամ Փաշինյանի գրառումները խորքային են: «Այո»,- պատասխանեց նա:

Հովիկ Աղազարյանն ասաց, որ այսօր Հայաստանում օլիգարխներ չկան. «Այն ժամանակ, երբ ԲՀԿ-ն կառավարության մաս էր, օլիգարխ էին ԲՀԿ ղեկավար կազմից որոշ մարդիկ, մասնավորապես՝ Գագիկ Ծառուկյանը, այն ժամանակ՝ Սամվել Ալեքսանյանը, դասական օրինակ էր ՊԵԿ նախկին նախագահ Գագիկ Խաչատրյանը, և այդ տիպի մարդիկ»:

Հիմա Սամվել Ալեքսանյանն ու Խաչատուր Սուքիասյանը, ըստ նրա՝ օլիգարխներ չեն. «Որովհետև կառավարության կազմում չկա որևէ մեկը, որը գտնվի իրենց հետ այնպիսի կապերի մեջ, որը հատուկ է օլիգարխիային բնութագրելու համար: Օլիգարխը այն մեծահարուստն է, որը զբաղվում է անմիջական բիզնեսով, ընդ որում՝ մի քանի ոլորտներում, և իշխանական բարձրագույն օղակներում ունի ազդեցության լծակներ: Հիմա Խաչատուր Սուքիասյանը կամ Սամվել Ալեքսանյանը բավարարում են մյուս կատեգորիաներին՝ բիզնեսմեն են, մեծահարուստ են, մնում է այս մի կատեգորիան հստակեցնենք՝ իշխանության բարձրագույն օղակներում իրենք չունեն ազդեցության լծակներ»:

Դիտարկմանը՝ մամուլը գրում է Խաչատուր Սուքիասյանի և ԱԺ փոխնախագահ Ալեն Սիմոնյանի սերտ կապերի մասին, նաև խոսվում է, որ Սամվել Ալեքսանյանը ֆինանսավորում է վարչապետի տիկին Աննա Հակոբյանի հիմնադրամը, նա այսպես արձագանքեց.

«Հիմնադրամի ֆինանսավորումը տարօրինակ չէ, երբ մեծահարուստները լուրջ գումարներ են տրամադրում: Իսկ ինչ վերաբերում է Ալեն Սիմոնյանի և Սուքիասյանի ենթադրյալ կապին, ապա պետք է ոչ թե այդ կապի մասին ասեք, այլ ասեք՝ պարոն Աղազարյան, հիշո՞ւմ եք՝ մի այսպիսի օրինագիծ ընդունվեց, որի ջատագովը Ալեն Սիմոնյանն էր, և որի արդյունքում Խաչատուր Սուքիասյանն այսպիսի առավելություն ստացավ: Եթե նման օրինակ կբերեք, ես կարող եմ դժվարանալ պաշտպանվել»:

Հովիկ Աղազարյանը վստահեցրեց՝ Հայաստանը հիմա աշխարհի քիչ երկրների մեջ է՝ ժողովրդավարության առումով. «Ես աշխարհում ուրիշ երկիր չգիտեմ, որտեղ կոռուպցիայի կանխարգելման հանձնաժողովի նախագահը լինի ընդդիմությունից: Ընդդիմությունն ազատ է իր գործունեության մեջ, և դա ոչ թե իշխանությանը, այլ պետությանն է օգուտ: Ամեն մեկը, երբ կատարում է իր ֆունկցիան, ապա դա օգուտ է միայն պետությանը»:

Նկատեցինք՝ խորհրդարանական ընդդիմությունն ԱԺ իշխող խմբակցությանը մեղադրում է իրենց ներկայացրած օրենսդրական նախաձեռնությունների 90 տոկոսը մերժելու, հետագայում դրանք թեթևակի կոսմետիկ փոփոխության ենթարկելուց հետո իշխանության անունից ներկայացնելու մեջ:

Հովիկ Աղազարյանը հակադարձեց. «Եթե դու փայլուն գաղափար ունես, և այդ գաղափարը նպատակաուղղված է ծառայելու ազգին և պետականությանը, դա ուրիշ ձևով է արվում, ինչո՞ւ ես այդքան վրդովված: Երկրորդ՝ նման ձևակերպման հետ համաձայն չեմ: Լինում է՝ նախագիծ է գալիս ընդդիմության կողմից, որը քննարկման ընթացակարգ ունի, դրա մեջ մտնում է նաև կառավարության կողմից գնահատականը, իսկ կառավարությունը գիտի, որ վաղը չէ մյուս օրը պատրաստվում է ներկայացնել այլ նախագիծ, որի մեջ դա ներառված է, հիմա ի՞նչ իմաստ ունի ծանրաբեռնել օրենսդրությունը»:

Դիտարկմանը՝ դե, ասում են՝ իրենց գաղափարներն եք գողանում, նա այսպես արձագանքեց. «Է, լավ ենք անում՝ գողանում ենք, եթե նույնիսկ գողանում ենք: Լավ գաղափարները մենք հա էլ գողանալու ենք»:

Անդրադառնալով այն կարծիքներին, թե ընդդիմադիր խոսք ասողներին ճնշում է իշխանությունների ֆեյքերի բանակը, նա հետևյալն ասաց. «Հիմա մեր քաղաքական թիմի երիտասարդ ընկերներն ունե՞ն նման սայթեր, թե՞ չունեն, ես չեմ կարող ասել: Չեմ բացառում, բայց չեմ էլ կարող ասել: Երբեմն-երբեմն տեսնում եմ, որ իմ հարցազրույցների տակ ֆեյքերը, որոնք վերջին հայհոյանքին են արժանացնում, կան ֆեյքեր, որոնք ինձ չեն հայհոյում, նույնիսկ գովում են, երևի դրանք մեր երիտասարդ գործընկերների ֆեյքերն են: Բայց սիստեմավորված ձևով դա արդյունք չի տա»:

ՍԴ դատավորներին թոշակի ուղարկելու որոշումը պատգամավորը ճնշում չի համարում. «Դա պայմանավորված է նրանով, որ ժողովուրդն իր հեղափոխությունն ավարտել է գործադիր իշխանության, օրենսդիր իշխանության մակարդակով, չի ավարտել դատական համակարգի մակարդակով, և այդտեղ էլ հեղափոխական փոփոխություններ պետք է անպայման տեղի ունենան: Այդ կոնտեքստում ՍԴ դատավորներին արված առաջարկությունը բավականին նորմալ առաջարկություն է,  շատ ճիշտ որոշում է՝ հասարակության մեջ համերաշխությունը պահպանելու համար: Ոչ մի ճնշում չի լինի, ճնշումը դրսից է, և գիտենք՝ որտեղից, ու ոչ մեկն էլ հրաժարական չի տալու: Ճնշումը նախկին իշխանությունների կողմից է»:

Մանրամասները՝ 168.am-ի տեսանյութում