Ինդոնեզիայում արհեստական ինտելեկտը կփոխարինի նախարարների օգնականներին
Ինդոնեզիայի նախագահ Ջոկո Վիդոդոն որոշել է վերացնել նախարարական օգնականների մի քանի կատեգորիաների լիազորությունները, որոնց աշխատանքը կսկսի կատարել արհեստական ինտելեկտը: Այդ մասին նոյեմբերի 28-ին հայտնել է The Jakarta Post թերթը։
«Ես նախարարներին կարգադրել եմ երրորդ եւ չորրորդ կատեգորիայի աշխատակիցներին փոխարինել արհեստական ինտելեկտի տեխնոլոգիայով,- հայտարարել է պետության ղեկավարը:-Այն թույլ կտա ավելի արագ կատարել բյուրոկրատական աշխատանքը»:
Ինչպես պարզաբանել է Ինդոնեզիայի տնտեսության հարցերի համակարգող նախարար Այիրլանգա Խարտարտոն, նորամուծությունը, մասնավորապես, կօգտագործվի պետական թույլատրագրեր տալիս:
«Արհեստական ինտելեկտը մեզ թույլ կտա թույլտվություններ ձեւակերպել՝ հիմնվելով ռիսկերի գնահատման ավտոմատ համակարգի վրա»,-ասել է պաշտոնյան, հաղորդել է ՏԱՍՍ-ը:
