Հրանտ Բագրատյանը հերքում է առաջարկվող պաշտոնի շուրջ պայմանավորվածության լուրը
Օրերս Հադրութի շրջանում Արցախի «Ազատ Հայրենիք» կուսակցության առաջնորդ Արայիկ Հարությունյանի հրավիրած ճամբարային հավաքին, որտեղ ներկա էր նաև ՀՀ նախկին վարչապետ Հրանտ Բագրատյանը, հարց ու պատասխանի ժամանակ Բագրատյանը հետաքրքիր խոստովանություն է արել:
Երիտասարդ մասնակիցներից մեկի հարցին՝ արդյոք Արցախի տնտեսական վերելքին այդքան հավատացող Հրանտ Բագրատյանը չի պատրաստվո՞ւմ տեղափոխվել և հաստատվել Արցախում, մանավանդ, որ նույն զարգացումը, ըստ իրեն, չի կանխատեսվում Հայաստանում, Բագրատյանը դրական պատասխան է հնչեցրել:
Նա չի բացառել, որ հենց եկող տարվանից կտեղափոխվի Արցախ, սակայն ընդգծել է, որ դա պայմանավորված կլինի բացառապես Արցախում սպասվող 2020-ի նախագահական ընտրությունների արդյունքների ելքով:
Նկատենք, Հրանտ Բագրատյանը մշտապես խիստ քննադատության է ենթարկել գրեթե բոլոր վարչապետների գործունեությունը, թերևս, միակը, ում նա խնայել է՝ Արայիկ Հարությունյանն է եղել, երևի առավելապես հենց մտերմիկ կապից ելնելով:
Ի դեպ, վերջին շրջանում Հրանտ Բագրատյանին և Արայիկ Հարությունյանին հաճախադեպ կարելի է տեսնել Երևանի և Արցախի սրճարաններում: Եվ ինչպես 168.am-ի աղբյուրն է պնդում, նրանց հաճախակի դարձած հանդիպումները, ինչպես նաև ճամբարում հնչած հարցը պատահականություն չարժե համարել: Իրականում այս «զուգադիպությունը» մեսիջ էր Հայաստանի և Արցախի իշխանություններին՝ իրենց հետագա համատեղ աշխատանքի մասին: Բանն այն է, որ Արայիկ Հարությունյանի կողմից արդեն իսկ տարբեր միջավայրերում հնչել է տեսակետ, թե 2020 թվականի ընտրություններին իր նախագահ դառնալուց հետո Բագրատյանը կդառնա Արցախի Հանրապետության պետնախարար: Եվ այս պայմանավորվածությունը, ըստ լուրերի՝ ձեռք է բերվել օրերս նրանց միջև երկար տևած հանդիպման և քննարկումների արդյունքում:
Նկատենք՝ այս նշանակման հավանական լինել-չլինելը կասկած է հարուցում, թերևս, միայն ՀՀ վարչապետի հավանությունը ստանալու տեսանկյունից, եթե, իհարկե, դրա անհրաժեշտությունը կա:
Շատեին կզարմացնի Արայիկ Հարությունյանի համարձակ որոշումն առ այն, որ նա հանդգնել է բարձր պաշտոն առաջարկել մեկին ու հեռահար ծրագրեր մշակել մի անձի հետ, ով ամեն օր լրատվամիջոցներում ջանք ու եռանդ չի խնայում քննադատելու ՀՀ վարչապետ Նիկոլ Փաշինյանի վարած քաղաքականությունը:
Հեղափոխությունից այս կողմ նա մշտապես սուր քննադատության է ենթարկում ՀՀ վարչապետ Նիկոլ Փաշինյանի կադրային և տնտեսական քաղաքականությունը, մինչդեռ Փաշինյանը ինչպես հայտնի է, սատարում է Արայիկ Հարությունյանին:
Արցախում սպասվող ընտրություններին, ենթադրվում է, որ Արայիկ Հարությունյանը կհամարվի ՀՀ իշխանությունների թեկնածուն: Վերջին մեկ տարում կողմերը չեն թաքցնում իրենց համագործակցությունը՝ Հարությունյանի կապերն օգտագործելով տնտեսական ներդրումների միջավայր ստեղծելու, քաղաքական բանակցությունների հարցում, ընդհուպ՝ հանրահավաքների կազմակերպման համար «մասովկա» ապահովելու դեպքերում:
Ուստի քաղաքական պրոցեսների զարգացումների ֆոնին զարմանալի է դառնում Արայիկ Հարությունյանի անկաշկանդ որոշումը, իսկ թե որքանով այս որոշումը կողջունվի Փաշինյանի կողմից, և ինչպես են պատկերացնում հետագա համագործակցությունը ՀՀ և Արցախի հանրապետության կառավարությունների միջև, ցույց կտա ժամանակը:
Հրանտ Բագրատյանը 168.am-ի հետ զրույցում չցանկացավ ժամանակից առաջ ընկնել և մեկնաբանել ապագայի հարցեր, մանավանդ, որ ընտրություններին դեռ երկար ժամանակ կա: Նա հերքեց, որ իր և Արայիկ Հարությունյանի միջև պետնախարար նշանակվելու մասին որոշակի պայմանավորվածություն է ձեռք բերվել:
«Որևէ խոսակցություն ընտրություններից առաջ լինել չի կարող»,- ընդգծեց Հրանտ Բագրատյանը:
Մեր ճշտող հարցին՝ խոսվում է պարոն Հարությունյանի նման մտադրության մասին, Դուք բացառո՞ւմ եք, որ կհամաձայնեք ու կտեղափոխվեք Արցախ, պարոն Բագրատյանը հումորով արձագանքեց.
«Տեսականորեն կարելի է չբացառել ոչինչ: Բայց էդ խոսակցությունը ճիշտ չէ, կոռեկտ չեմ համարի ասել՝ պատրաստ եմ… որովհետև նույնն է թե՝ ասեք, օրինակ, պատրա՞ստ եք փոխարինել Նիկոլ Փաշինյանին, կամ՝ եկող տարի ամուսնալուծվել ու նորից ամուսնանալ…»:
Անդրադառնալով ճամբարում Արայիկ Հարությունյանի կազմակերպած հավաքին՝ նա պարզաբանեց.
«Զրույցը եղել է այսպես՝ մի աղջիկ հարց է հնչեցրել՝ Դուք կգա՞ք Ղարաբաղ և շարունակելո՞ւ եք աջակցել Ղարաբաղին: Ես ասացի՝ իհարկե կգամ, իսկ եթե պարոն Հարությունյանը հաղթի, ես ավելի հաճախ էստեղ կլինեմ, սա է եղել, ուրիշ թեմա գոյություն չունի: Ես աղջկա հարցը բնական եմ համարել, քանի որ այնտեղ շատերը գիտեն, որ ես, արդեն 15 տարի է՝ ամեն ամիս Ղարաբաղում եմ, նրանք ինձ հետ խորհրդակցում են որոշ հարցերի շուրջ:
Ղարաբաղում տնտեսական զարգացման մոդելը, բիզնես մտածողությունը բավականին մոդեռն է, համարենք՝ մենք մի ստորակետի օգուտ ենք տվել Արցախին: Եվ շատերն են գիտակցում՝ այն, ինչ կա ու տեսանելի է այսօր բոլորին, դա հենց Արայիկ Հարությունյանի և Բակո Սահակյանի աշխատանքով ստեղծածն է: Ղարաբաղում տնտեսական աճը 10 %-ից պակաս չի լինում, գիտենք, որ Ղարաբաղը բոլոր մակրոտնտեսական ցուցանիշներով գերազանցել է այսօր Հայաստանին, ընդհուպ՝ Ադրբեջանին, Վրաստանին: Եվ ես անչափ ուրախ եմ այդ հաջողությունների համար:
Արայիկ Հարությունյանն ապացուցել է, որ Ղարաբաղը կարող է ինքնուրույն տնտեսական քաղաքականություն տանել և հաջողել, ունենալ բյուջետային եկամուտների լուրջ աճ: Հիշեք, Ղարաբաղում բոլոր աշխատատեղերն ուժային կառույցում էին միայն, այսօր նպաստ ստացողները լուրջ աշխատանք ունեն, ստեղծվել են կայուն աշխատատեղեր: Մենք այսօր միայն ինտեգրացիայի խնդիր ունենք:
Ահա այս հարցերով եմ ես այնտեղ հաճախում, համատեղ լուրջ զբաղվում ենք, բայց ուրիշ խոսակցություն լինել չի կարող ընտրություններից առաջ»:
Ի դեպ, հաջորդ ուշագրավ տեղեկությունը, որ փոխանցվեց Արցախի մեր աղբյուրից, Արայիկ Հարությունյանի մյուս պայմանավորվածությունների մասին է, հաջորդ հրապարակումներում կփորձենք ճշտված տեղեկություն տալ Հայաստանից Արցախ տեղափոխվել պատրաստվող մյուս հայտնի անունների մասին, որոնց համար նախապայմանը դարձյալ 2020 թվականի ընտրություններին Արայիկ Հարությունյանի հաղթանակը պիտի լինի:
Սյուզի Բադոյան
