Մարզպետի խաղաքարտերը խառնել է իր իսկ աշխատակիցը. նշանակում չի լինի

Երեկ Արարատի մարզպետ Գարիկ Սարգսյանը վերջապես հնարավորություն ուներ «Վեդու» բժշկական կենտրոնի (ԲԿ) նոր ղեկավար նշանակելու և վերջ դնելու այդ պաշտոնի շուրջ մեկ տարի ծավալվող ինտրիգային խմորումներին, բայց այս անգամ էլ մարզպետին խանգարել է իր իսկ աշխատակիցը:

Մարզպետարանի սոցիալական բաժնի աշխատակից Նունե Մարտիկյանը ևս մասնակցում էր ապրիլի 2-ին՝ մարզպետարանում «Վեդու» ԲԿ ղեկավարի թափուր տեղի համար հայտարարված մրցույթին։ Երկու փուլում անհայտորեն լավ ներկայացած թեկնածուն, սակայն, անսպասելիորեն դուրս մղվեց հաղթողների շարքից, ինչն աննկատ չմնաց նաև մրցույթը հսկող լրագրողների կողմից:

Նշենք, որ մրցույթի սուբյեկտիվության մասով առաջին իսկ պահից կասկած էր հարուցում հենց մրցութային հանձնաժողովը: 6 հոգանոց կազմից միայն մեկն էր, որ մարզպետարանի աշխատակազմից չէր, ընդ որում, նրանցից երկուսը հենց մարզպետի ազգականներն էին, իսկ հանձնաժողովը նախագահում էր մարզպետ Գարիկ Սարգսյանի «բաջանաղը»՝ փոխմարզպետ Արտավազդ Նազարեթյանը:

Վարկած կա՝ այս անհասկանալի կազմով մրցութային հանձնաժողովը հենց մարզպետի հրահանգով է որոշել վերջին պահին «բլոկ անել» իրենց թիմի անդամին՝ թույլ չտալու, որպեսզի փայլուն արդյունքներ գրանցած միակ կին թեկնածուն խառնի մարզպետի խաղաքարտերը: Իսկ մարզպետի թեկնածուի մասին, մարզում շրջանառվող լուրերի համաձայն՝ միջնորդությունն արված է եղել դեռ անցած տարի՝ այս պաշտոնը թափուր դարձնելու նախապայմանով: Միջնորդն էլ Սպարապետ Վազգեն Սարգսյանի երբեմնի հովանավորյալ, նրանց ընտանիքի այն ժամանակների բարեկամ Ռազմիկ Թևոնյանն է:

Երասխի գինու գործարանի սեփականատեր Ռազմիկ Թևոնյանը, որ բոլոր համապետական ընտրություններին մարզից ավանդաբար առաջադրվում էր «Հանրապետություն» կուսակցությունից ու ձախողում, հեղափոխությունից հետո մարզպետի հետ ունեցած փայլուն կապերի շնորհիվ կարողացավ մինչ այդ ոչնչով աչքի չընկած երիտասարդ որդուն՝ Սեդրակ Թևոնյանին, «Իմ քայլը» դաշինքով դարձնել պատգամավոր: Ստացվում է՝ Ռազմիկ Թևոնյանը մարզպետի հետ կապերն այս անգամ փորձում է ծառայեցնել «Վեդու» ԲԿ-ում նշանակվող իր թեկնածուի շահերին:

Այս ընթացքում հանդիպե՞լ եք մարզպետին, տեղյա՞կ եք՝ ի՞նչ վերաբեմունք ունի այս ամենին, հարցրեցինք Նունե Մարտիկյանին:

«Երկու անգամ փորձեցի, չհաջողվեց, ես հույս ունեմ՝ երկուշաբթի նախարարության ներկայացուցիչներն անկողմնակալ որոշում կկայացնեն։ Ամեն դեպքում մտադիր չեմ հանձնվել, պատրաստ եմ բոլոր սցենարներով զարգացումներին, բայց սպասենք մինչև որոշիչ երկուշաբթին»,- 168.am-ի հետ զրույցում ասաց Նունե Մարտիկյանը՝ չթաքցնելով, որ վճռական է տրամադրված ու, թերևս, պատրաստվում է դիմակայել նաև մարզպետարանի աշխատակազմի ներսում՝ սեփական կոլեկտիվի դիմակայություններին:

Երկուշաբթի՝ ապրիլի 8-ին, Առողջապահության նախարարությունը բողոքարկման հետքերով մարդկանց կգործուղի Արտաշատ՝ մարզպետարանում եղած մրցութային արձանագրություններն ուսումնասիրելու համար: Մրցույթի օրը բացակա գրանցված նախարարության ներկայացուցիչները պոստֆակտում պիտի ջանան մաքրել մարզպետի «ստեղծագործության հետքերը»:

Արդյո՞ք նոր մրցույթ կհայտարարվի «Վեդու» ԲԿ-ի համար, թե՞ այդուհանդերձ նախարարությունը կնախընտրի լեգալացնել իշխող ուժի առաջնորդի կողմից մեծ վստահություն վայելող վարչապետ Փաշինյանի սանիկ մարզպետի կամայականությունները, պարզ կդառնա երկուշաբթի օրը:

Հիշեցնենք, քաղաքական նկատառումներով հեղափոխությունից հետո մարզպետ դարձած Գարիկ Սարգսյանը միանգամից ազատվել էր մարզի երեք ԲԿ-ների ղեկավարներից, պաշտոնանկ արված «Արտաշատի», «Վեդու» և «Մասիսի» ԲԿ ղեկավարները, իրենց խոսքով՝ չենթարկվելով մարզպետի՝ դիմումներ գրելու հարկադրանքին, այդուհանդերձ ազատվել էին աշխատանքից, ու մարզպետի ապօրինի ազատման հրամաններն այսօր 5-6 հայցով վիճարկվում են դատարանում:

Նշենք, որ պաշտոնանկ արված բոլոր ԲԿ-ների նախկին ղեկավարներն էլ չմասնակցեցին իրենց նախկին պաշտոնների համար հայտարարված մրցույթներին՝ պատճառաբանելով, որ իրենց ազատումն ապօրինի են համարում, հետևաբար՝ ապօրինի ազատման հիմքերով թափուր թողնված տեղերի համար հայտարարված մրցույթները ևս ապօրինի որոշմամբ են կայացվել, ուստի համարում են, որ իրենց մասնակցությամբ անուղղակիորեն կլեգալացնեին մարզպետի՝ իրենց բնորոշմամբ՝ ապօրինի որոշումները:

Սյուզի Բադոյան