ԱԱԾ-ն ազատ է արձակել ՊՎԾ գործով կալանավորված պաշտոնյաներից մեկին
Պետական վերահսկողական ծառայության (ՊՎԾ) ձերբակալություների հայտնի գործով ԱԱԾ-ն նախօրեին որոշում է կայացրել և ազատ է արձակել կալանավորված պաշտոնատար անձանցից մեկին:
168.am-ի տեղեկություններով՝ 3 ձերբակալված անձանցից մեկը, ում նկատմամբ կալանավորումը՝ որպես խափանման միջոց, փոխվել է չհեռանալու մասին ստորագրությունով, հենց ՊՎԾ պաշտոնյաներից մեկն է:
«Դատավարական հսկողություն իրականացնող դատախազի որոշմամբ՝ Գևորգ Խաչատրյանի նկատմամբ կալանքը փոխարինվել է չհեռանալու մասին ստորագրությամբ»,- 168.am-ի հետ զրույցում մեր տեղեկությունը հաստատեց ԱԱԾ լրատվական ծառայության ղեկավար Սամսոն Գալստյանը:
Այլ մանրամասներ ԱԱԾ-ից մեզ չփոխանցվեցին: Հիշեցնենք, նույն գործով կալանավորված է մնում դեռևս երկու անձ՝ ՊՎԾ վարչության պետերից մեկը և նրան փոխկապակցված ձեռնարկատեր՝ «Զովաշեն» ՍՊԸ-ից:
Նշենք, որ Գևորգ Խաչատրյանը Պետական վերահսկողական ծառայության Գնումների գործընթացի վերահսկողական վարչության գլխավոր մասնագետն է:
Սյուզի Բադոյան
