Brexit-ի շուրջ վճռորոշ քվեարկությունը կարող է տեղի ունենալ ապրիլի 4-ին. The Sun
Բրիտանական խորհրդարանում Brexit-ի պայմանների վերաբերյալ համաձայնագրի նախագծի շուրջ վերջնական քվեարկությունը, որը վարչապետ Թերեզա Մեյի կողմից կնքվել է Եվրամիության հետ, կարող է կայանալ հինգշաբթի օրը՝ ապրիլի 4-ին: Այդ մասին հայտնել է The Sun թերթը:
Ապրիլի 1-ին բրիտանական խորհրդարանի պատգամավորները մերժել են Brexit-ի պայմանների վերաբերյալ ԵՄ-ի հետ համաձայնագրի նախագծի բոլոր չորս այլընտրանքները, որոնք ընտրվել էին Համայնքների պալատի խոսնակ Ջոն Բերքոուի կողմից:
Հրատարակության տեղեկատվության համաձայն, նախարարների կաբինետն ավելի ու ավելի է հակվում համաձայնելու իշխող Պահպանողական կուսակցությունից պատգամավոր Քենեթ Քլարկի՝ մերժված առաջարկին եւ «դժկամությամբ, բայց կհամաձայնի» այդ այլընտրանքին այն դեպքում, եթե խորհրդարանը չորրորդ անգամ հավանություն չտա Մեյի համաձայնագրի նախագծին:
Այդ նախաձեռնությունը կառավարությունից պահանջում էր ԵՄ-ի հետ ապագա ցանկացած համաձայնագրում կետ ներառել «ԵՄ-ի հետ մշտական ու համապարփակ մաքսային միության մասին, որը կտարածվի ամբողջ Մեծ Բրիտանիայի վրա»:
Իր հերթին The Times հրատարակության քաղաքական մեկնաբանը նշում է, որ թագավորության ֆինանսների նախարար Ֆիլիպ Համոնդը ապրիլի 2-ին կդիմի Մեյի կաբինետին՝ «խնդրելով քննարկել Brexit-ի հարցի շուրջ հանրաքվեի անցկացման հնարավորությունն այն բանի կապակցությամբ, որ ո՛չ պահպանողականները, ո՛չ երկիրն ինքը չեն կարող թույլ տալ ընտրությունների անցկացում:
Համոնդի կարծիքով՝ բրիտանական կառավարությունը կարող է «կա՛մ առաջարկել Brexit-ի շուրջ գործարքի փոխզիջումային տարբերակ, կա՛մ համաձայնել ԵՄ-ից դուրս գալու շուրջ երկրորդ հանրաքվեի անցկացմանը», հաղորդել է ՏԱՍՍ-ը:
