Dragon-2 տիեզերանավը «կվարի» «Օտարը» ֆիլմի հերոսուհու մանեկենը
Ռիփլի անունով Մանեկենը, որը անվանվել է «Օտարը» ֆիլմի հերոսուհու պատվին, մարտի 2-ին Միջազգային տիեզերակայան կթռչի Իլոն Մասքի SpaceX ընկերության մշակած Dragon-2 առաջին տիեզերանավի անձնակազմի անդամի բազկաթոռին: Այդ մասին հայտարարել է ընկերության փոխնախագահ Հանս Քենինգսմանը մամուլի ասուլիսում, որը հեռարձակվել է NASA-ի կայքում:
Ավելի վաղ NASA-ն հայտնել էր, որ Dragon-2 (Crew Dragon) տիեզերանավի առաջին արձակումն անօդաչու ռեժիմով դեպի Միջազգային տիեզերակայան պլանավորվում է մարտի 2-ին Երեւանի ժամանակով 11:49-ին, օդաչուավոր ռեժիմով՝ 2019 թվականի հուլիսին: Դրանով կթռչեն NASA-ի աստղանավորդներ Ռոբերտ Բենքենը եւ Դուգլաս Հեռլին:
Երկու թռիչքներն էլ՝ անօդաչու եւ օդաչուավոր, կլինեն փորձարկիչ, ինչից հետո Dragon-2 տիեզերանավը NASA-ի կողմից կհավաստագրվի Միջազգային տիեզերակայան կանոնավոր թռիչքների համար: «Նրա (կնոջ մանեկենի – խմբ.) անունը Ռիփլի է»,- ասել է Քենինգսմանը՝ ճշտելով, որ մանեկենն անվանվել է «Օտարը» ֆիլմի հերոսուհու պատվին:
Նա հավելել է, որ մանեկենը կսարքավորվի տվիչներով, որոնք կգնահատեն Dragon-2 տիեզերանավով թռիչքի պայմանների ազդեցությունն ապագա անձնակազմերի վրա, հաղորդել է ՌԻԱ Նովոստին:
