«Գազի սակագինը մեզ մոտ միշտ քաղաքական հարց է եղել, ու, ցավոք, Ռուսաստանն օգտվել է դրանից»
«Գազի սակագինը մեզ մոտ միշտ քաղաքական հարց է եղել, ու, ցավոք, Ռուսաստանը միշտ օգտվել է դրանից: Մի 10 տարի առաջ գազը սահմանին ավելի թանկ էր, բայց սպառողի մոտ սակագինը միշտ տատանվել է. 1000 խմ-ն 110-156 դրամի էր հասել, որը մի փոքր նվազեցրին՝ հասցնելով 139 դրամի: Այս սակագինը դեռ մնում է: «Գազպրոմ Արմենիան» երևի ուղիներ կգտնի, որպեսզի չթանկանա գազը»,- լրագրողների հետ հանդիպման ժամանակ ասաց «Սպառողների խորհրդատվական կենտրոն» հ/կ նախագահ Կարեն Չիլինգարյանը:
Նա նշեց, որ չի թանկանում սպառողների համար, բայց, օրինակ, հարևան Վրաստանում բիզնես ոլորտում գործողները գազի օգտագործման համար ավելի թանկ գին են վճարում, քան սովորական սպառողը:
Համարում են, որ բիզնեսմենը շահույթ է հետապնդում:
Հարցին՝ հնարավոր համարո՞ւմ է, որ գազի գինը մնա նույնը, բայց պետությունն այդ գումարը գանձի, ասենք, թոշակների, նպաստների հաշվին, Կարեն Չիլինգարյանը պատասխանեց, որ մինչ օրս նման խոսակցություն չի եղել:
«Այս հարցերը պետք է կառավարությանը տալ: Հուսամ, որ նման բան չի լինի, հակառակ դեպքում սոցիալապես խոցելի խավն ավելի կտուժի»,- նկատեց «Սպառողների խորհրդատվական կենտրոն» հ/կ նախագահը:
Նշենք, որ «Գազպրոմ Արմենիայի» և ՀՀ կառավարության միջև հունվարի 8-ից մեկնարկել են բանակցություններ գազի սակագնի շուրջ և կավարտվեն այն ժամանակ, երբ հարցի արդյունավետ լուծման տարբերակ կգտնվի:
Հիշեցնենք, որ հունվարի 1-ից ռուսական գազը սահմանին թանկացավ՝ 150 դոլարից դառնալով 165 դոլար՝ 1000 խմ-ի դիմաց: Ավելի վաղ վարչապետի պաշտոնակատարի մամուլի խոսնակ Արման Եղոյանը հայտարարել էր, որ գազի գնի սուբսիդավորման հարց չի քննարկվել և չի քննարկվում և դրա մասին ընդհանրապես խոսք չկա: Նրա խոսքով՝ այդ 15 դոլարի տարբերությունը հատուցվելու է շնորհիվ «Գազպրոմ Արմենիայի» գործունեության արդյունավետության բարձրացման և ծախսերի կրճատման։
Անի Կարապետյան
