«Լավ, նախկինները վատն էին, գործը չէին բացահայտում, բա այժմ նորերն են եկել, ու իբրև ազնիվ են, մաքուր են, թող բացահայտեն Մարտի 1-ը». Սամվել Նիկոյան
ՀՀԿ ԳՄ անդամ Սամվել Նիկոյանն այսօրվա ասուլիսում անդրադառնալով մարտի 1-ի դեպքերին, նշեց, որ նախկին ընդիմությունը և ներկայիս իշխանություններն ամբողջ այս տարիների ընթացքում մարտի 1-ի զոհերի հարազատներին մի օր տանում էին Գլխավոր դատախազության, մի օր՝ խորհրդարանի, մի օր էլ՝ նախագահականի մոտ, և պահանջում էին բացահայտել այն մարդկանց, որոնց գործողությունների հետևանքով զոհեր են եղել։
«Ամբողջ 10 տարի օգտագործվել են զոհերի հարազատները՝ քարոզչություն իրականացնելու նպատակով։ Իշխանափոխությունից հետո անցել է 6 ամիս, նոր իշխանությունը, որը մասնակից է եղել մարտի 1-ի իրադարձություններին, այսօր կա՞ մեկ դեպք, երբ հայտնաբերած լինի որևէ մեկին և ապացուցի, որ նրա գործողության պատճառով զոհ է եղել։
Այս գործի բացահայտման հարցում շահագրգռված մարդկանցից մեկն եմ, քանի որ տեսել եմ զոհերի հարազատների արցունքները։
Եթե նախկին 10 տարիների ընթացքում ոչինչ չի արվել, այսօր իշխանության են եկել մարդիկ, որոնք ինչ-որ բան պետք է անեին, ինչո՞ւ չեն անում։ Լավ, նախկինները վատն էին, գործը չէին բացահայտում, բա այժմ նորերն են եկել, ու իբրև ազնիվ են, մաքուր են, թող բացահայտեն»,- նշեց Սամվել Նիկոյանը։
Ըստ նրա, մարտի 1-ի դեպքերի հետ կապված՝ գրեթե ամեն օր ՀՔԾ պետը և Նիկոլ Փաշինյանը հայտարարություններ էին տարածում, նախկինում դրանց հավատում էր՝ կարծելով, թե իրավական լուրջ հիմքեր ունեն, սակայն այժմ հասկացել է, որ դրանք ընդամենը հայտարարություններ են։
Զվարթ Խաչատրյան
