«Հաճելի է և շահավետ». Կառավարության նիստերի դահլիճներում այսուհետ տեղադրված կլինեն հայկական արտադրության համակարգիչներ
Կառավարության նիստերի դահլիճներում այսուհետ տեղադրված կլինեն հայկական արտադրության համակարգիչներ: Այսօրվա նիստում այս մասին հայտարարեց ՀՀ վարչապետ Նիկոլ Փաշինյանը:
«Կառավարության նիստերի համակարգչային ապահովումը փոխվել է: Մենք հայտարարել ենք, որ Հայաստանում բարձր տեխնոլոգիաների զարգացումը մեզ համար առաջնահերթություն է, ընդ որում, ոչ միայն ծրագրային ապահովման, այլև՝ կոնկրետ արտադրանքի իմաստով»,- ասաց վարչապետը:
Նա ընդգծեց, որ Ազգային ժողովում ևս պետք է նման փոփոխություն տեղի ունենա:
«Պետք է ֆինանսական աջակցություն ցուցաբերել, որպեսզի Ազգային ժողովի նիստերի դահլիճում ևս տեղադրվեն հայկական արտադրության համակարգիչներ: Մեր երկրի համար շատ կարևոր է, որ Հայաստանում արտադրությունը զարգանա, մենք բոլորս նախապատվությունը պետք է տանք հայկական արտադրությանն ու հայկական արտադրողներին: Ինչպես տեսնում եք, այդպիսի հնարավորություն կա»,- նշեց Նիկոլ Փաշինյանը:
ՀՀ բոլոր քաղաքացիներին էլ վարչապետը կոչ արեց գնումներ կատարելիս նախապատվությունը տալ հայկական արտադրությանը:
«Դա և՛ հաճելի է, և՛ շահավետ, և մեծացնում է տեղական արտադրության ու արտադրողների հնարավորությունները»,- ասաց նա:
